“Xalq qabulxonasi” tarmoqlarda Jizzax viloyatining Paxtakor tumanida joylashgan barak tipidagi uylar pala-partishlik bilan, aholining o‘z hisobidan buzdirilayotgani to‘g‘risidagi xabarlarga munosabat bildirdi.
“Ozodlik” radiosida e’lon qilingan xabarda tumandagi ayrim oilalar loy va paxsadan uy tiklagani, ayrimlari esa yangi uy qurishga imkoni bo‘lmagani sabab yarim vayrona uylar va chodirlarda yashayotgani ta’kidlangan.
“Xalq qabulxonasi”ning munosabatida keltirilishicha, O‘zbekiston Prezidentining 2019-yil 3-yanvardagi “Jizzax viloyatini kompleks rivojlantirishni davlat tomonidan tartibga solish va boshqarishning samarali modelini ishlab chiqish to‘g‘risida”gi farmoni orqali Jizzaxda “Ilg‘or hudud” sinov loyihasini amalga oshirish vazifasi belgilab berilgan va barcha tuman markazlari kabi Paxtakor tumani markazini ham yangilash boshlangan.
Tuman markazini yangilash davomida 1960—1970-yillarda qurilgan 56 ta ko‘p qavatli, 88 ta barak tipidagi uy-joy ko‘chirilishi va ular o‘rnida ko‘p qavatli zamonaviy uy-joylar qurilishi belgilangan.
Har bir xonadonni o‘rganish davomida barak uylarda istiqomat qiluvchilardan 120 ta oila yangi barpo etilayotgan ko‘p qavatli uylarga ko‘chib o‘tish istagini bildirgan. 880 ta oilaga yakka tartibda uy-joy qurish uchun yer maydoni ajratib berilgan.
“Buzish qiyin emas, lekin qurish vaqt, mablag‘, kuch talab qilishini yosh bola ham biladi. Bu yerda esa qariyb mingta uyning qurilishi haqida gap bormoqda. Yangi uy qurishga hammaning ham qurbi yetmasligi aniq. Shuning uchun Mirzacho‘ldagi tajriba qo‘llanilib, baraklarni buzishga hech kim shoshgani yo‘q.
Yangi uy qurib, ko‘chib chiqib ketganlardan ayrimlari o‘zlariga tegishli barakni buzib, eski qurilish materiallaridan foydalanmoqda. Ko‘pchilik uchastkasi boshida hokimiyat tomonidan berilgan chodirda yashab, yoz davomida qurilishni yakunlab oldi. Hozirgacha uchta yangi massivdagi 470 ta uyning tomi yopilib, ko‘pida egalari yashamoqda”, — deyiladi xabarda.
Izoh (0)