«Халқ қабулхонаси» тармоқларда Жиззах вилоятининг Пахтакор туманида жойлашган барак типидаги уйлар пала-партишлик билан, аҳолининг ўз ҳисобидан буздирилаётгани тўғрисидаги хабарларга муносабат билдирди.
«Озодлик» радиосида эълон қилинган хабарда тумандаги айрим оилалар лой ва пахсадан уй тиклагани, айримлари эса янги уй қуришга имкони бўлмагани сабаб ярим вайрона уйлар ва чодирларда яшаётгани таъкидланган.
«Халқ қабулхонаси»нинг муносабатида келтирилишича, Ўзбекистон Президентининг 2019 йил 3 январдаги «Жиззах вилоятини комплекс ривожлантиришни давлат томонидан тартибга солиш ва бошқаришнинг самарали моделини ишлаб чиқиш тўғрисида»ги фармони орқали Жиззахда «Илғор ҳудуд» синов лойиҳасини амалга ошириш вазифаси белгилаб берилган ва барча туман марказлари каби Пахтакор тумани марказини ҳам янгилаш бошланган.
Туман марказини янгилаш давомида 1960—1970 йилларда қурилган 56 та кўп қаватли, 88 та барак типидаги уй-жой кўчирилиши ва улар ўрнида кўп қаватли замонавий уй-жойлар қурилиши белгиланган.
Ҳар бир хонадонни ўрганиш давомида барак уйларда истиқомат қилувчилардан 120 та оила янги барпо этилаётган кўп қаватли уйларга кўчиб ўтиш истагини билдирган. 880 та оилага якка тартибда уй-жой қуриш учун ер майдони ажратиб берилган.
«Бузиш қийин эмас, лекин қуриш вақт, маблағ, куч талаб қилишини ёш бола ҳам билади. Бу ерда эса қарийб мингта уйнинг қурилиши ҳақида гап бормоқда. Янги уй қуришга ҳамманинг ҳам қурби етмаслиги аниқ. Шунинг учун Мирзачўлдаги тажриба қўлланилиб, баракларни бузишга ҳеч ким шошгани йўқ.
Янги уй қуриб, кўчиб чиқиб кетганлардан айримлари ўзларига тегишли баракни бузиб, эски қурилиш материалларидан фойдаланмоқда. Кўпчилик участкаси бошида ҳокимият томонидан берилган чодирда яшаб, ёз давомида қурилишни якунлаб олди. Ҳозиргача учта янги массивдаги 470 та уйнинг томи ёпилиб, кўпида эгалари яшамоқда», — дейилади хабарда.
Изоҳ (0)