“Valyutani tartibga solish to‘g‘risida”gi qonunning yangi tahriri kuchga kirishi munosabati bilan tashkil etilgan matbuot anjumanida Markaziy bank raisi o‘rinbosari Bobur Abubakirov dollar kursi yuqorilagani sayin bozordagi ko‘plab tovarlar narxi oshib ketishi bilan bog‘liq holatga izoh berdi, deya xabar bermoqda “Daryo” muxbiri Musulmonbek Ibrohimov.
“Dollar kursi yuqorilasa, bozordagi narx-navoning ko‘tarilib ketishi milliy valyuta bilan bog‘liq emas. Narxning oshishi, deylik, valyuta evaziga olib kelinayotgan import mahsulotlari tannarxining ko‘tarilishi bilan bog‘liq. Import qilinayotgan mahsulotning narxi xorijda oshadigan bo‘lsa, bu, albatta, bizda ham o‘z aksini ko‘rsatadi. Bu bozor iqtisodiyoti tamoyillari asosida belgilanadigan narsa”, — dedi Abubakirov.
Markaziy bank raisi o‘rinbosarining qo‘shimcha qilishicha, O‘zbekistonda hisob-kitob faqat milliy valyutada bo‘lishi degan me’yor avval ham bo‘lgan. Ammo, shunga qaramay, masalan, O‘zbekistonda ishlab chiqarilgan avtomobillarning ayrim turlari yoki aviachiptalar baribir valyutaga sotilardi.
“Shunday bo‘lsa-da, bankka borib valyuta ololmasdingiz. Oxir-oqibat xalq zarar ko‘rardi. Tovarlarni valyutada sotishga ruxsat berish kabi me’yorlarni belgilash orqali xalqni bankdan tashqarida xufiyona iqtisodiyot — noqonuniy valyuta amaliyotlarini amlaga oshirishga majbur qilar edik”, — dedi Abubakirov.
“Mahalliy bozorda milliy valyutadan foydalanish valyuta o‘zgarishi bilan bog‘liq xatarlarning oldini oladi. Biz ochiq, shaffof davlatmiz. Import mahsulotining jahon bozorida narxi oshishi bilan bog‘liq tashqi shoklar, istaymizmi-yo‘qmi, iqtisodiyotimizda o‘z aksini ko‘rsatadi”, — deya qo‘shimcha qildi Markaziy bank raisi o‘rinbosari.
Izoh (0)