«Валютани тартибга солиш тўғрисида»ги қонуннинг янги таҳрири кучга кириши муносабати билан ташкил этилган матбуот анжуманида Марказий банк раиси ўринбосари Бобур Абубакиров доллар курси юқорилагани сайин бозордаги кўплаб товарлар нархи ошиб кетиши билан боғлиқ ҳолатга изоҳ берди, дея хабар бермоқда «Дарё» мухбири Мусулмонбек Иброҳимов.
«Доллар курси юқориласа, бозордаги нарх-навонинг кўтарилиб кетиши миллий валюта билан боғлиқ эмас. Нархнинг ошиши, дейлик, валюта эвазига олиб келинаётган импорт маҳсулотлари таннархининг кўтарилиши билан боғлиқ. Импорт қилинаётган маҳсулотнинг нархи хорижда ошадиган бўлса, бу, албатта, бизда ҳам ўз аксини кўрсатади. Бу бозор иқтисодиёти тамойиллари асосида белгиланадиган нарса», — деди Абубакиров.
Марказий банк раиси ўринбосарининг қўшимча қилишича, Ўзбекистонда ҳисоб-китоб фақат миллий валютада бўлиши деган меъёр аввал ҳам бўлган. Аммо, шунга қарамай, масалан, Ўзбекистонда ишлаб чиқарилган автомобилларнинг айрим турлари ёки авиачипталар барибир валютага сотиларди.
«Шундай бўлса-да, банкка бориб валюта ололмасдингиз. Охир-оқибат халқ зарар кўрарди. Товарларни валютада сотишга рухсат бериш каби меъёрларни белгилаш орқали халқни банкдан ташқарида хуфиёна иқтисодиёт — ноқонуний валюта амалиётларини амлага оширишга мажбур қилар эдик», — деди Абубакиров.
«Маҳаллий бозорда миллий валютадан фойдаланиш валюта ўзгариши билан боғлиқ хатарларнинг олдини олади. Биз очиқ, шаффоф давлатмиз. Импорт маҳсулотининг жаҳон бозорида нархи ошиши билан боғлиқ ташқи шоклар, истаймизми-йўқми, иқтисодиётимизда ўз аксини кўрсатади», — дея қўшимча қилди Марказий банк раиси ўринбосари.
Изоҳ (0)