Isroil bosh vaziri “Likud” partiyasi yetakchisi Binyamin Netanyaxu koalitsion hukumatni tashkil etishning uddasidan chiqa olmadi va mandatni prezident Reuven Rivlinga qaytardi. Rivlin bu haqda Twitter’dagi sahifasida ma’lum qilgan, deb yozmoqda Meduza.
Isroil prezidenti endi hukumatni shakllantirish bo‘yicha mandat “Kaxol-Lavan” muxolifat partiyasi yetakchisi Beni Gansga topshirilishini bildirdi. Gansga hukumatni tashkil qilish uchun 28 kun muddat berilgan.
Joriy yilning aprel oyida Isroilda parlament (Knesset) uchun saylovlar bo‘lib o‘tgan. Saylovlar yakuniga ko‘ra, “Likud” va “Kaxol-Lavan” 120 o‘rinli parlamentda 35 tadan deputatga ega bo‘lgandi.
Netanyaxu belgilangan muddatda hukumat koalitsiyasini tashkil qila olmadi va Knesset mamlakat tarixida ilk bor parlament saylovlarining qaytadan o‘tkazilishini ma’lum qildi.
Takroriy saylovlar 17-sentabrda o‘tkazildi, ularga ko‘ra “Kaxol-Lavan” parlamentda 33, “Likud” esa 32 o‘ringa ega bo‘ldi. Saylovlardan keyin Beni Gans Binyamin Netanyaxuning koalitsion hukumat tashkil qilish bo‘yicha taklifini rad etgan.
Izoh (0)