Исроил бош вазири «Ликуд» партияси етакчиси Бинямин Нетаньяху коалицион ҳукуматни ташкил этишнинг уддасидан чиқа олмади ва мандатни президент Реувен Ривлинга қайтарди. Ривлин бу ҳақда Twitter’даги саҳифасида маълум қилган, деб ёзмоқда Meduza.
Исроил президенти энди ҳукуматни шакллантириш бўйича мандат «Кахоль-Лаван» мухолифат партияси етакчиси Бени Гансга топширилишини билдирди. Ганцга ҳукуматни ташкил қилиш учун 28 кун муддат берилган.
Жорий йилнинг апрель ойида Исроилда парламент (Кнессет) учун сайловлар бўлиб ўтган. Сайловлар якунига кўра, «Ликуд» ва «Кахоль-Лаван» 120 ўринли парламентда 35 тадан депутатга эга бўлганди.
Нетаньяху белгиланган муддатда ҳукумат коалициясини ташкил қила олмади ва Кнессет мамлакат тарихида илк бор парламент сайловларининг қайтадан ўтказилишини маълум қилди.
Такрорий сайловлар 17 сентябрда ўтказилди, уларга кўра «Кахоль-Лаван» парламентда 33, «Ликуд» эса 32 ўринга эга бўлди. Сайловлардан кейин Бени Ганс Бинямин Нетаньяхунинг коалицион ҳукумат ташкил қилиш бўйича таклифини рад этган.
Изоҳ (0)