Surxondaryo viloyatida bojxona organlari tomonidan yirik miqdordagi giyohvand moddalarning g‘ayriqonuniy aylanmasiga chek qo‘yildi. Bu haqda Davlat bojxona qo‘mitasi matbuot xizmati xabar berdi.
Surxondaryo viloyati bojxona boshqarmasi kontrabanda va bojxona qonunchiligi buzilishiga qarshi kurashish bo‘limi xodimlari viloyat Ichki ishlar boshqarmasi vakillari bilan Termiz shahrida o‘tkazilgan tezkor tadbirda X.B. ismli fuqaro boshqaruvida bo‘lgan Spark rusumli avtomashina tekshirilgan.
Natijada ushbu shaxsning egnidagi kiyimlari cho‘ntaklarida o‘n to‘rt dona qog‘oz parchalariga o‘ralgan 18,43 gramm marixuana giyohvandlik vositasi borligi aniqlangan.
Shundan so‘ng tezkor tadbir davom ettirilib, fuqaro X.B.ning ko‘rsatmasiga asosan, Termiz tumanida istiqomat qiluvchi fuqaroning xonadoni ham xolislar ishtirokida ko‘zdan kechirilgan.
Tekshiruv jarayonida hovli tomorqasida 1 tup nasha giyohvandlik o‘simligi parvarishlanayotgani hamda yordamchi xo‘jalikda polietilen qoplar va gugurt qutilarida umumiy og‘irligi 20,825 kilogrammni tashkil etuvchi marixuana giyohvandlik vositasi saqlab kelinayotganligi ma’lum bo‘lgan.
Hozirda mazkur holat yuzasidan jinoyat ishi qo‘zg‘atilgan bo‘lib, tekshiruv harakatlari olib borilmoqda.
Izoh (0)