Сурхондарё вилоятида божхона органлари томонидан йирик миқдордаги гиёҳванд моддаларнинг ғайриқонуний айланмасига чек қўйилди. Бу ҳақда Давлат божхона қўмитаси матбуот хизмати хабар берди.
Сурхондарё вилояти божхона бошқармаси контрабанда ва божхона қонунчилиги бузилишига қарши курашиш бўлими ходимлари вилоят Ички ишлар бошқармаси вакиллари билан Термиз шаҳрида ўтказилган тезкор тадбирда Х.Б. исмли фуқаро бошқарувида бўлган Spark русумли автомашина текширилган.
Натижада ушбу шахснинг эгнидаги кийимлари чўнтакларида ўн тўрт дона қоғоз парчаларига ўралган 18,43 грамм марихуана гиёҳвандлик воситаси борлиги аниқланган.
Шундан сўнг тезкор тадбир давом эттирилиб, фуқаро Х.Б.нинг кўрсатмасига асосан, Термиз туманида истиқомат қилувчи фуқаронинг хонадони ҳам холислар иштирокида кўздан кечирилган.
Текширув жараёнида ҳовли томорқасида 1 туп наша гиёҳвандлик ўсимлиги парваришланаётгани ҳамда ёрдамчи хўжаликда полиэтилен қоплар ва гугурт қутиларида умумий оғирлиги 20,825 килограммни ташкил этувчи марихуана гиёҳвандлик воситаси сақлаб келинаётганлиги маълум бўлган.
Ҳозирда мазкур ҳолат юзасидан жиноят иши қўзғатилган бўлиб, текширув ҳаракатлари олиб борилмоқда.
Изоҳ (0)