Milliy gvardiya xodimlari va fuqarolar o‘rtasida yuz bergan kelishmovchilik aks etgan video “Sizdan Telegram” kanalida e’lon qilindi.
Videodagi yozuvlardan voqeaning Andijon viloyatida yuz berganini ko‘rish mumkin. Unda Milliy gvardiyaning Qo‘riqlash xizmati xodimlari va bir erkak o‘rtasida yuz bergan janjal aks etgan. Milliy gvardiya xodimlari ularga qarshi gapirayotgan erkakni jim qilishga uringan.
Milliy gvardiyaning Qo‘riqlash boshqarmasi matbuot xizmati mazkur holat bo‘yicha bayonot berdi.
Ma’lum qilinishicha, Andijon viloyati Qo‘riqlash xizmati texnik qo‘riqlash punkti tomonidan Andijon shahar, 3-kichik dahada joylashgan xonadonlardan biri fuqaro N.I. bilan 2019-yil 28-avgust kuni tuzilgan shartnomaga asosan qo‘riqqa olingan.
2019-yilning 30-avgust kuni soat 20:50 da ushbu xonadondan “Tashvish” xabari kelib tushgan. Tezkor harakatlanuvchi guruh tomonidan xonadonga yetib borilganida, ushbu xonadonda fuqaro N.I.ning ukasi A.I. va uning turmush o‘rtog‘i A.Q. ikki nafar voyaga yetmagan farzandi bilan xonadon kirish eshigini o‘zlarida bo‘lgan kalit yordamida ochib kirganligi aniqlangan. A.I. va uning turmush o‘rtog‘i A.Q.ga qo‘riqlovga olingan mulk talablari to‘g‘risida tushuncha berilib, hududiy IIBga borishlari lozimligi tushuntirilgan.
Fuqaro A.I. va uning turmush o‘rtog‘i qo‘riqlash xizmati xodimlari bilan nizo keltirib chiqarish maqsadida qo‘liga o‘tkir tig‘li jism olib, o‘ziga tan jarohati yetkazishi bilan qo‘rqitishga tushgan va voqea joyidan ketib qolgan. Ushbu holat yuzasidan tegishliligi bo‘yicha ma’lumot kiritilgan.
Shundan so‘ng, 2019-yilning 20-sentabr kuni qo‘riqlovdagi ushbu xonadonga o‘rnatilgan signalizatsiya vositalaridan qayta-qayta “Tashvish” xabari kelib tushgan bo‘lib, har bir holat bo‘yicha tekshiruv o‘tkazilganda uy atrofida hech kim aniqlanmaganligi sababli soxta tashvish xabari sifatida rasmiylashtirilgan. O‘sha kuni soat 16:00 da navbatdagi “Tashvish” xabari bo‘yicha zudlik bilan yetib borgan tezkor guruh xodimlari tomonidan 3-kichik daha, 61-uy 5-xonadon atrofi qayta ko‘zdan kechirish mobaynida xonadonning ichki qismini ko‘zdan kechirilishi zarurati tug‘ilgan.
Xodimlar o‘rnatilgan tartibda ushbu xonadon va mahallaning ishonchli vakillaridan iborat guvohlar hamda o‘zlari bilan birga kelgan elektromontyor bilan birgalikda signalizatsiya vositalarini ko‘zdan kechirish uchun xonadonga kirganida, ularning izidan xonadon egasining ukasi I. A. kirib baqir-chaqir qilib, Qo‘riqlash xodimlarini haqorat qila boshlagan. Qo‘riqlash punkti xodimlari A.I.ga vaziyatni tushuntirib, ushbu xonadon qo‘riqlovga olinganligini, bu bo‘yicha xonadon egasi N.I. bilan shartnoma mavjudligini, signalizatsiya ishlab ketganlik holati bo‘yicha xonadonni ko‘zdan kechirishi va dalolatnoma tuzishi lozimligi tushuntirilganda, fuqaro A.I. mobil telefoni orqali ularni videoga olishni boshlagan. Milliy gvardiya xodimlari A.I.ni xonadondan chiqargan va xonadonni qayta qo‘riqqa topshirgan.
Xabarda aytilishicha, fuqaro A.I. va uning yonida bo‘lgan ayol ko‘chaga chiqqandan keyin xodimlarni turli xil uyatsiz so‘zlar bilan haqorat qilishni boshlagan, biroq bu holatni videoga olmagan. Xodimlar bu xonadonni fuqaro N.I. bilan tuzilgan shartnoma orqali qo‘riqqa olganligini, agarda ushbu xonadon yoki uning egasi bilan mulkiy nizolari bo‘lsa, sudga murojaat qilishi lozimligi, qo‘riqda bo‘lgan obyektga nisbatan tajovuz uchun qonuniy javobgarlik mavjudligini tushuntirishga harakat qilgan, deyiladi Milliy gvardiya bayonotida.
Qayd etilishicha, bu tushuntirishlarni eshitishni xohlamagan fuqaro A.I. jazavaga tushib, xodimlarni haqorat qilishda davom etgandan so‘ng xodim safdor F.Yunusov yonidagi PR-73 rezina tayoqchasini qo‘lga olib, qo‘riqlovdagi obyektga tajovuz qilganligi uchun gumondor sifatida hamda xodimlarni haqorat qilganligi uchun tegishli chora qo‘llanilishi, zarur bo‘lsa, jismoniy kuch ishlatilishi mumkinligi to‘g‘risida A.I.ni keskin ogohlantirgan va ulardan voqea joyini tark etishni so‘ragan.
Mahallaning ishonchli vakillariga ushbu holat fuqaro A.I. tomonidan ataylab uyushtirilganligi va qo‘riqlash xizmati xodimlari bilan nizoli vaziyatni yuzaga keltirish maqsadida bo‘lganligi ma’lum bo‘lgan.
O‘zbekiston Respublikasi Milliy gvardiyasi Andijon viloyati Qo‘riqlash boshqarmasi mas’ul xodimlari tomonidan ushbu holat yuzasidan xizmat tekshiruvi o‘tkazilib, fuqarolar bilan muomala vaqtida qo‘pollikka yo‘l qo‘ygan xodimlarga belgilangan tartibda intizomiy jazo choralari qo‘llanilgan.
Ta’kidlanishicha, Andijon shahar “Oxunboboyev” mahalla fuqarolar yig‘ini raisi tomonidan 2016-yilning 21-iyul kunida Fuqarolik ishlari bo‘yicha Andijon viloyati sudiga berilgan ma’lumotnomada fuqaro I.A. Andijon shahar 3-kichik daha, 61-uy, 5-xonadonda ro‘yxatda turmasligi va istiqomat qilmasligi ko‘rsatilgan hamda ushbu xonadonga tegishli “Uy daftari”ga kiritilmagan.
Fuqaro I.A. o‘zining yaqinlari bilan bir necha marotaba mulk talashib nizolashgan, ularga tan jarohati yetkazganligi uchun ichki ishlar organlari tomonidan belgilangan tartibda sud orqali ma’muriy javobgarlikka tortilgan, shuningdek, unga nisbatan 2012-yilda O‘zbekiston Respublikasi Jinoyat Kodeksining 165-moddasida (tovlamachilik) ko‘rsatilgan jinoyatni sodir etgani uchun 7 yilga ozodlikdan mahrum etish jazosi qo‘llanilgan.
Fuqaro A.I. 2019-yilning 2-oktabr kuni opasi N.I.ga tegishli bo‘lgan 86 million so‘mlik mol-mulklarni yashirincha olib chiqib ketganligi holati bo‘yicha Andijon shahar IIO FMB tomonidan surishtiruv ishlari olib borilmoqda.
Izoh (0)