Qarshi shahridagi “Tabassum” mahallasi Bunyodkorlik ko‘chasidagi 1/1, 1/2, 1/3, 1/4-sonli ko‘p qavatli turar joylar atrofida bir paytlari chiqindixona mavjud bo‘lgan. Lekin hech qanday sabablarsiz chiqindixona o‘rnida tadbirkorlar qurilish ishlarini boshlab yuborgan. Bu esa aholining jiddiy e’tirozlariga sabab bo‘ldi. Ko‘p qavatli uylar yonidagi chiqindixona buzib tashlangan. Bu haqda Nasafnews xabar bermoqda.
Nashrga murojaat qilgan fuqarolar mahalladagi chiqindilar uylarigacha kirib ketayotganidan shikoyat qilgan.
Ma’lum bo‘lishicha, chiqindixona to‘rtta ko‘p qavatli uy uchun mo‘ljallangan edi. Lekin Sog‘lomlashtirish markaziga yaqin bo‘lgani uchun tadbirkorlar tomonidan buzib tashlangan. “Chiqindi joyiga “Mexanizator”, “Geolog”, “Mag‘zon”, “Tabassum” mahallasidagi aholi ham chiqindi to‘kib ketadi. Kimdir itning o‘ligini, yana kimdir qo‘yning jasadini ham keltirib tashlaganiga o‘zim guvoh bo‘lganman”, — deydi aholi vakillaridan biri.
Aholi vakillarining so‘zlariga ko‘ra, chiqindi to‘kiladigan joy uylar derazalarining tagida joylashgan. Uylarni chivinlar va pashshalar bosib ketadi. Bu esa yosh bolalar salomatligidan tashvishga tushishga sabab bo‘lmoqda.
“Qo‘y va hayvonlarning jasadini “Ekotrans” olib ketmaydi. Ba’zida o‘n kunlab hayvonlarning o‘ligi sasib yotadi. Chiqindixona buzilganligi sababli har kim xohlagan joyiga chiqindi to‘kib ketaveradi. Bu bo‘yicha portalga yozdik. Prokuraturaga ham murojaat qildik”, — degan Gulnoza Bekmurodova ismli mahalla fuqarosi.
Qayd etilishicha, mahallada yashamaydigan begona kishilarning ham chiqindi to‘kib ketishi sababli chiqindilar 2 kunga bormay katta uyum hosil qiladi.
Aholi mahallada faoliyat ko‘rsatayotgan shirkatning faoliyatiga ham e’tiroz bildirmoqda. Ularning so‘zlariga ko‘ra, mahalla raisi va shirkat rahbari bu masalalarga yechim topish o‘rniga oddiy odamlar bilan qo‘pol muomalada bo‘lgan.
“Chiqindilar uyimizgacha kirib kelayapti. Atrofimiz ko‘rib turganingizdek, chiqindixonaga aylanib bo‘lgan. Har kuni tozalashgani bilan mahallada yashamaydigan ayrim fuqarolarning madaniyati bo‘lmagandan keyin shunday holat bo‘ladi-da”, — degan birinchi guruh nogironi Shavkat Temirov.
Izoh (0)