Миллий гвардия ходимлари ва фуқаролар ўртасида юз берган келишмовчилик акс этган видео «Сиздан Telegram» каналида эълон қилинди.
Видеодаги ёзувлардан воқеанинг Андижон вилоятида юз берганини кўриш мумкин. Унда Миллий гвардиянинг Қўриқлаш хизмати ходимлари ва бир эркак ўртасида юз берган жанжал акс этган. Миллий гвардия ходимлари уларга қарши гапираётган эркакни жим қилишга уринган.
Миллий гвардиянинг Қўриқлаш бошқармаси матбуот хизмати мазкур ҳолат бўйича баёнот берди.
Маълум қилинишича, Андижон вилояти Қўриқлаш хизмати техник қўриқлаш пункти томонидан Андижон шаҳар, 3-кичик даҳада жойлашган хонадонлардан бири фуқаро Н.И. билан 2019 йил 28 август куни тузилган шартномага асосан қўриққа олинган.
2019 йилнинг 30 август куни соат 20:50 да ушбу хонадондан «Ташвиш» хабари келиб тушган. Тезкор ҳаракатланувчи гуруҳ томонидан хонадонга етиб борилганида, ушбу хонадонда фуқаро Н.И.нинг укаси А.И. ва унинг турмуш ўртоғи А.Қ. икки нафар вояга етмаган фарзанди билан хонадон кириш эшигини ўзларида бўлган калит ёрдамида очиб кирганлиги аниқланган. А.И. ва унинг турмуш ўртоғи А.Қ.га қўриқловга олинган мулк талаблари тўғрисида тушунча берилиб, ҳудудий ИИБга боришлари лозимлиги тушунтирилган.
Фуқаро А.И. ва унинг турмуш ўртоғи қўриқлаш хизмати ходимлари билан низо келтириб чиқариш мақсадида қўлига ўткир тиғли жисм олиб, ўзига тан жароҳати етказиши билан қўрқитишга тушган ва воқеа жойидан кетиб қолган. Ушбу ҳолат юзасидан тегишлилиги бўйича маълумот киритилган.
Шундан сўнг, 2019 йилнинг 20 сентябрь куни қўриқловдаги ушбу хонадонга ўрнатилган сигнализация воситаларидан қайта-қайта «Ташвиш» хабари келиб тушган бўлиб, ҳар бир ҳолат бўйича текширув ўтказилганда уй атрофида ҳеч ким аниқланмаганлиги сабабли сохта ташвиш хабари сифатида расмийлаштирилган. Ўша куни соат 16:00 да навбатдаги «Ташвиш» хабари бўйича зудлик билан етиб борган тезкор гуруҳ ходимлари томонидан 3-кичик даҳа, 61-уй 5-хонадон атрофи қайта кўздан кечириш мобайнида хонадоннинг ички қисмини кўздан кечирилиши зарурати туғилган.
Ходимлар ўрнатилган тартибда ушбу хонадон ва маҳалланинг ишончли вакилларидан иборат гувоҳлар ҳамда ўзлари билан бирга келган электромонтёр билан биргаликда сигнализация воситаларини кўздан кечириш учун хонадонга кирганида, уларнинг изидан хонадон эгасининг укаси И. А. кириб бақир-чақир қилиб, Қўриқлаш ходимларини ҳақорат қила бошлаган. Қўриқлаш пункти ходимлари А.И.га вазиятни тушунтириб, ушбу хонадон қўриқловга олинганлигини, бу бўйича хонадон эгаси Н.И. билан шартнома мавжудлигини, сигнализация ишлаб кетганлик ҳолати бўйича хонадонни кўздан кечириши ва далолатнома тузиши лозимлиги тушунтирилганда, фуқаро А.И. мобил телефони орқали уларни видеога олишни бошлаган. Миллий гвардия ходимлари А.И.ни хонадондан чиқарган ва хонадонни қайта қўриққа топширган.
Хабарда айтилишича, фуқаро А.И. ва унинг ёнида бўлган аёл кўчага чиққандан кейин ходимларни турли хил уятсиз сўзлар билан ҳақорат қилишни бошлаган, бироқ бу ҳолатни видеога олмаган. Ходимлар бу хонадонни фуқаро Н.И. билан тузилган шартнома орқали қўриққа олганлигини, агарда ушбу хонадон ёки унинг эгаси билан мулкий низолари бўлса, судга мурожаат қилиши лозимлиги, қўриқда бўлган объектга нисбатан тажовуз учун қонуний жавобгарлик мавжудлигини тушунтиришга ҳаракат қилган, дейилади Миллий гвардия баёнотида.
Қайд этилишича, бу тушунтиришларни эшитишни хоҳламаган фуқаро А.И. жазавага тушиб, ходимларни ҳақорат қилишда давом этгандан сўнг ходим сафдор Ф.Юнусов ёнидаги ПР-73 резина таёқчасини қўлга олиб, қўриқловдаги объектга тажовуз қилганлиги учун гумондор сифатида ҳамда ходимларни ҳақорат қилганлиги учун тегишли чора қўлланилиши, зарур бўлса, жисмоний куч ишлатилиши мумкинлиги тўғрисида А.И.ни кескин огоҳлантирган ва улардан воқеа жойини тарк этишни сўраган.
Маҳалланинг ишончли вакилларига ушбу ҳолат фуқаро А.И. томонидан атайлаб уюштирилганлиги ва қўриқлаш хизмати ходимлари билан низоли вазиятни юзага келтириш мақсадида бўлганлиги маълум бўлган.
Ўзбекистон Республикаси Миллий гвардияси Андижон вилояти Қўриқлаш бошқармаси масъул ходимлари томонидан ушбу ҳолат юзасидан хизмат текшируви ўтказилиб, фуқаролар билан муомала вақтида қўполликка йўл қўйган ходимларга белгиланган тартибда интизомий жазо чоралари қўлланилган.
Таъкидланишича, Андижон шаҳар «Охунбобоев» маҳалла фуқаролар йиғини раиси томонидан 2016 йилнинг 21 июль кунида Фуқаролик ишлари бўйича Андижон вилояти судига берилган маълумотномада фуқаро И.А. Андижон шаҳар 3-кичик даҳа, 61-уй, 5-хонадонда рўйхатда турмаслиги ва истиқомат қилмаслиги кўрсатилган ҳамда ушбу хонадонга тегишли «Уй дафтари»га киритилмаган.
Фуқаро И.А. ўзининг яқинлари билан бир неча маротаба мулк талашиб низолашган, уларга тан жароҳати етказганлиги учун ички ишлар органлари томонидан белгиланган тартибда суд орқали маъмурий жавобгарликка тортилган, шунингдек, унга нисбатан 2012 йилда Ўзбекистон Республикаси Жиноят Кодексининг 165-моддасида (товламачилик) кўрсатилган жиноятни содир этгани учун 7 йилга озодликдан маҳрум этиш жазоси қўлланилган.
Фуқаро А.И. 2019 йилнинг 2 октябрь куни опаси Н.И.га тегишли бўлган 86 миллион сўмлик мол-мулкларни яширинча олиб чиқиб кетганлиги ҳолати бўйича Андижон шаҳар ИИО ФМБ томонидан суриштирув ишлари олиб борилмоқда.
Изоҳ (0)