Farg‘ona viloyati Dang‘ara tumanida xonadonlardan biriga tushgan o‘g‘rilar xonadon egasi tomonidan tutib olindi hamda o‘zboshimchalik bilan “samosud” qilindi. Bu haqda “Sevimli” telekanalining “Zamon” informatsion-tahliliy dasturida ma’lum qilindi.
Ushbu holat aks etgan videolavha ijtimoiy tarmoqlarda keng tarqaldi.
Dastlabki tergov harakatlari davomida to‘plangan ma’lumotlarga ko‘ra, 1-oktabr kuni soat 6:30 larda Dang‘ara tumani “Oltiqush” mahallasi So‘lim ko‘chasida joylashgan xonadonlardan biriga ikki kishi oldindan jinoiy til biriktirib, o‘g‘rilikka tushgan. Ular yuzlariga niqob taqib olgan va temir seyfni buzishga mo‘ljallangan qo‘lbola usulda yasalgan moslama bilan qurollangan. Jinoyatchilar xonadon egasining yotoqxonasidagi seyfni buzib, ichidagi 12 million 500 ming so‘m miqdoridagi pullarni yashirin ravishda qo‘lga kiritgan.
O‘g‘rilar xonadon atrofini o‘ragan devordan oshayotganlarida uy egasining rafiqasi ularni ko‘rib qoladi va qo‘shnilarni yordamga chaqiradi. Qo‘shnilar “Oltiqush” mahallasi hududidagi “Sultonboy” bog‘dorchilik xo‘jaligi hududida uy egasi, qarindoshlari, qo‘shnilari tomonidan tutib olingan va o‘sha yerda kaltaklanib, telefonga videoga tushirilgan. Video Telegram messenjeri orqali tarqatilgan.
Dastlabki tergov harakatlari davomida gumonlanuvchilar tomonidan o‘g‘irlangan 12 million 500 ming so‘m pul, niqob va seyfni ochishga mo‘ljallangan temir moslama ashyoviy dalil sifatida olingan.
Holat yuzasidan Dang‘ara tuman IIB tomonidan jinoyat ishi qo‘zg‘atilgan hamda dastlabki tergov harakatlari olib borilmoqda.
Izoh (0)