“O‘zstandart” agentligi tomonidan taklif qilingan mamlakatga elektrotexnika mahsulotlarini olib kirishni cheklash to‘g‘risidagi hukumat qarori loyihasi bo‘yicha matbuot anjumani bo‘lib o‘tdi. Bu haqda Spot xabar berdi.
Axborot va ommaviy kommunikatsiyalar agentligida “O‘zstandart” agentligi, Bojxona qo‘mitasi, Iste’molchilar huquqlarini himoya qilish federatsiyasi va boshqa tuzilma vakillari ishtirokida anjuman bo‘lib o‘tdi. Tadbirda Respublika sinov va sertifikatlashtirish markazi davlat korxonasi direktori Oqilbek Mustafoyev qaror loyihasi bo‘yicha o‘z munosabatini bildirdi.
“O‘zbekistonda iste’molchi kafolatlangan texnik xizmatdan foydalana oladigan joy bo‘lishi kerak. Sotib olgan mahsuloti buzilsa, uni qayerga olib boradi? Xitoygami? Rossiya yoki Germaniyagami? Mamlakat bozoridagi jahon brendlarining ko‘pchiligida allaqachon servis markazlari va rasmiy dilerlar mavjud. O‘ylaymizki, o‘zgarishlar narxlarga ta’sir qilmaydi”, — dedi Oqilbek Mustafoyev.Agentlik 1985-yilda BMTning Bosh Assambleyasi tomonidan qabul qilingan iste’molchilar huquqlarini himoya qilishga doir rezolyutsiyaga asoslanib, ushbu taklifni kiritgani ta‘kidlandi.
Shuningdek, “O‘zstandart” Apple’ning O‘zbekistonda rasmiy xizmat ko‘rsatish markazini ochmasligi haqidagi bayonotiga izoh berdi.
“Biz vaziyatni o‘rgandik. Vaziyat taqozo qilganda Apple boshqa mamlakatlarda o‘z xizmat ko‘rsatish markazlarini ochgan”, — deb ta’kidlagan Oqilbek Mustafoyev.
Agentlik tomonidan qayd etilishicha, xizmat ko‘rsatish markazlarining mavjud bo‘lish talabi importning keskin tushishiga va narxning oshishiga sabab bo‘lmaydi.
Izoh (0)