Toshkent viloyatidagi Textile Technologies Group korxonasiga qarashli Chinoz paxta to‘qimachilik ishlab chiqarish klasteri maydonida ilk bor organik paxta yetishtirildi, deb xabar bermoqda O‘zA.
“Hozir Chinoz tumanining 217 gektar maydonida ilk bor organik paxta yetishtirildi. Organik paxta parvarishi uchun kimyoviy va mineral o‘g‘itlar ishlatilmay, aksincha, biomahsulotlar ishlatildi. Kutilgan natija esa a’lo darajada. Hosildorlik ham yuqori, har bir gektaridan 30 sentnerdan hosil olinmoqda”, — degan Chinoz paxta to‘qimachilik ishlab chiqarish klasteri mutaxassisi Tursunboy Komilov.
Yetishtirilgan organik paxtaning sifat darajasini aniqlash maqsadida Bolgariyadan kelgan Control union tashkiloti inspektor-auditori Yekaterina Tomeva mahsulotga yuqori baho bergan. Uning fikricha, mahsulotdan nafaqat oliy navli tola, balki chigitidan ekologik toza paxta yog‘i olish mumkin. Mahsulot jahon va Yevropa bozorida sifati bo‘yicha bozordagi narxi bir yarim barobar qo‘shimcha qiymatga ega.
Shuningdek, 8-oktabr kuni Chinozda yetishtirilgan organik paxta xalqaro ekologik talablarga to‘liq javob berishi to‘g‘risidagi sertifikatga ega bo‘ldi. Endi mahsulotni jahon va Yevropa bozoriga eksport qilish mumkin.
Ma’lumot uchun, Textil Technologies Group MChJ shaklidagi xorijiy korxona 2010-yilda tashkil etilgan bo‘lib, u 2013-yildan boshlab o‘z ishlab chiqarish faoliyatini boshlagan. Asosiy faoliyati kalava ip ishlab chiqarishga ixtisoslashgan. Korxonaning yillik quvvati 5400 tonnani tashkil etadi. Korxonada ishlab chiqarilgan mahsulotlar Xitoy, Turkiya, Eron, Koreya davlatlariga, shuningdek, Rossiya, Belarus va Qirg‘izistonga eksport qilinadi.
Izoh (0)