O‘zbekistonga import qilinishi rejalashtirilgan 72 tonna kartoshka hujjatlari qalbakilashtirilgani ma’lum bo‘ldi

“O‘zdavkarantin” inspeksiyasi joriy yilning so‘nggi 8 oyi davomida respublikadan eksport qilingan qishloq xo‘jaligi mahsulotlari bilan O‘zbekistonda mavjud bo‘lgan karantin organizmlari boshqa davlatlarga o‘tib tarqalishi yoki xorijdan import qilinayotgan karantin ostidagi mahsulotlardagi zararli organizmlar respublikaga hududida tarqalib ketishining oldini olish bo‘yicha amalga oshirilgan ishlar yuzasidan ma’lumot berdi.

Jumladan, 323 tonna (shundan 235 tonnasi qo‘l yuki, 88 tonnasi transport vositalari orqali), 10,25 million dona (shundan 41 ming donasi qo‘l yuki, 10,21 million donasi transport vositalari orqali) va 1317 metr kub miqdorida transport vositalari orqali respublikaga olib kirilayotgan o‘simlik mahsulotlarida zararli organizmlar aniqlanganligi sababli chegara maskanlaridan qaytarib yuborilgan. Qaytarib yuborishning imkoni bo‘lmagan 3,1 million dona zararlangan ko‘chatlar esa yoqish yo‘li bilan tegishli tartibda yo‘q qilingan.

Shuningdek, xorijdan O‘zbekistonga import qilinishi rejalashtirilgan 72 tonna kartoshka yuk egalari tomonidan tegishli hujjatlar qalbakilashtirilgani aniqlanib, chegaradan o‘tkazilmagan. Shu bilan birga, 6 500 tonna miqdoridagi urug‘lik kartoshka o‘simliklar karantini bo‘yicha mutaxassislar tomonidan fitosanitar holatni o‘rganish chog‘ida eksport qiluvchi davlatning o‘zida qoniqarsiz deb baholandi va mamlakatimizga import qilinishiga yo‘l qo‘yilmagan.

Respublikadan chet davlatlarga chiqarilayotgan 63,5 tonna (14,5 tonnasi qo‘l yuki, 49 tonnasi transport vositalari orqali) va 7 ming dona (5 ming donasi qo‘l yuki, 2 ming donasi transport vositalari orqali) karantin ostidagi mahsulotlar fitosanitar talablarga javob bermaganligi sababli eksport qilinishiga yo‘l qo‘yilmaga va ularga nisbatan karantin tadbirlari amalga oshirilib, belgilangan tartibda ichki bozorga chiqarilgan.

O‘zbekistonning amaldagi qonunchiligiga muvofiq, eksportga jo‘natilayotgan hamda respublikaga import qilinayotgan o‘simlik mahsulotlarini karantin tekshiruvidan o‘tkazish Vazirlar Mahkamasi huzuridagi O‘simliklar karantini davlat inspeksiyasi zimmasiga yuklatilgan.