FVV tomonidan sel va suv toshqini xavf mavjud bo‘lgan hududlarda 1577 nafar hamda yer ko‘chishi va o‘pirilishi mavjud bo‘lgan hududlarda esa 2013 nafar fuqaro yashayotganligi aniqlangan. Bu haqda 14-oktabr kuni FVV vakillari juonalistlar bilan bo‘lib o‘tgan ochiq muloqotda ma’lum qilindi, deya xabar bermoqda “Daryo” muxbiri Musulmonbek Ibrohimov.
Berilgan axborotga ko‘ra, vazirlik tomonidan geologik va gidrometeorologik hodisalar sodir bo‘lishi mumkin bo‘lgan xavfli hududlar o‘rganib chiqilgan. O‘rganish natijasida respublikaning gidrometeorologik (sel, suv toshqini) xavf mavjud bo‘lgan 38 ta hududda 289 ta xo‘jalik va 1577 nafar fuqaro va geologik xavf (yer ko‘chishi, o‘pirilishi) mavjud bo‘lgan 27 ta hududda esa 75 ta xo‘jalik, 2013 nafar fuqaro yashayotganligi aniqlangan.
Shundan 24 ta xo‘jalik va 31 nafar fuqaroni (Sirdaryo viloyatida 20 ta xo‘jalik, 27 nafar fuqaro hamda Toshkent viloyatida 4 ta xo‘jalik, 4 nafar fuqaro) real xavf bo‘lganda vaqtincha ko‘chirish talab etilgan.
Shu kunga qadar gidrometerologik va geologik xavfli uchastkalarda istiqomat qiluvchi respublika aholisini muhofaza qilish uchun 113 ta xo‘jalik va 569 nafar fuqaro xavfli hududlardan yashash uchun xavfsiz hududlarga ko‘chirilgan. Shuningdek, 226 ta xo‘jalik hamda 1220 nafar fuqaro sel va suv toshqin suvlaridan muhofaza qilinib, ularga bo‘lgan xavf bartaraf etilgan.
Surxondaryo va Toshkent viloyatlarida 18 ta xo‘jalik 121 nafar fuqaroni sel va toshqin suvlaridan muhofaza qilish maqsadida loyiha-smeta hujjatlari asosida qirg‘oq mustahkamlash ishlari ketmoqda.
Izoh (0)