Senatorlar ikkita shahar, beshta tuman chegaralarini o‘zgartirish to‘g‘risidagi masalani ma’qulladi. Bu haqda Oliy Majlis Senatining 23-yalpi majlisidan “Daryo” muxbiri Musulmonbek Ibrohimov xabar bermoqda.
Senat 23-yalpi majlisida Namangan viloyatining Namangan shahri, To‘raqo‘rg‘on, Kosonsoy, Namangan va Yangiqo‘rg‘on tumanlari, Andijon viloyatining Xonobod shahri va Qo‘rg‘ontepa tumani chegaralarini o‘zgartirish to‘g‘risidagi masalalar ko‘rib chiqildi.
Xususan, Namangan shahrining markaziy qismi va asosiy ko‘chalari shaharning bosh rejasiga asosan qayta qurilishi natijasida keyingi yillarda shaharga tutash bo‘lgan qo‘shni tumanlari, ya’ni Kosonsoy, Namangan va Yangiqo‘rg‘on tumanlari hududlaridan jami 1,039 gektar yer maydonlariga shahar markazida uy-joylari buzilishga tushgan aholi uchun yangi turar joy mavzelarini barpo etish uchun ajratib berildi.
Mazkur hududlardagi aholi va o‘zini-o‘zi boshqarish organlari ma’muriy boshqaruv tizimi bo‘yicha Namangan shahriga bo‘ysunuvchi bo‘lgani holda yer maydonlari hozirga qadar tumanlar hududiga tegishlidir.Bu esa o‘z navbatida kommunal xizmatlar ko‘rsatish, hududlarni kompleks rivojlantirish, yo‘llar va kommunikatsiyalarni qurilishida bir qator muammolarni keltirib chiqarmoqda.
Namangan viloyati hokimi, senator Xayrulla Bozorovning ma’lum qilishicha, Namangan shahriga mazkur tuman hududlaridan yer maydoni qo‘shib berilishi birinchi navbatda Namangan shahri aholisini turmush tarzini yaxshilash maqsadida kelgusida har tomonlama qulay ko‘p qavatli uylar qurilishi uchun muhim ahamiyat kasb etadi.
Shu sababli Namangan shahri tarkibiga To‘raqo‘rg‘on, Kosonsoy, Namangan va Yangiqo‘rg‘on tumanlarining jami 3,665 gektar yer maydonini o‘tkazish nazarda tutilmoqda.
Shuningdek, Andijon viloyatining Xonobod shahriga 1972-yilda asos solingan bo‘lib, aholisi 41 ming kishini, umumiy yer maydoni 23 kvadrat kilometrni tashkil etadi. Bugungi kunda Xonobod shahri hududi kichikligi sababli ishlab chiqarish va xizmat ko‘rsatish obyektlarini barpo etishga yetarlicha imkon berilmayapti.
Shu bois Qo‘rg‘ontepa tumanidagi to‘rtta – “Sultonobod”, Xonobod”, “Sh.Rashidov” va “Avazmatov” mavzelarida joylashgan jami 1,284 gektar yer maydonini Xonobod shahri tarkibiga o‘tkazilishi shahar aholisiga qulay sharoitlar yaratishga hamda shaharning ijtimoiy-iqtisodiy salohiyatini oshishiga xizmat qiladi.
Andijon viloyati hokimi, senator Shuhrat Abdurahmonovning ma’lum qilishicha, Xonobod shahri dastlab tashkil etilganda aholi soni dastlab 21,5 ming nafar bo‘lgan bo‘lsa, bugungi kunda 41 ming nafarni tashkil etmoqda.
“Xonobod shahrida barcha kommunikatsiya tarmoqlarining mavjudligi, ishlab chiqarish hamda turistik salohiyatga ega ekanligi sababli mahalliy hamda xorijiy investorlar tomonidan mazkur hududga qiziqish ortib, yer ajratish bilan bog‘liq muammolar yuzaga kelmoqda”, — dedi Andijon viloyati hokimi.
Jumladan, Xonobod shahriga o‘tkazilayotgan yer maydonlarining 492 gektarida dam olish maskanlari, mehmonxonalar va kempinglar, 21 gektarida sport inshootlari, 145 gektarida ishlab chiqarish korxonalari hamda 284 gektarida boshqa zarur muhandislik obyektlari, shuningdek, 267 gektarida bog‘lar va zamonaviy issiqxonalar tashkil etilishi rejalashtirilgan.
Ta’kidlanishicha, Namangan viloyatining Namangan shahri, To‘raqo‘rg‘on, Kosonsoy, Namangan va Yangiqo‘rg‘on tumanlari, shuningdek, Andijon viloyatining Xonobod shahri va Qo‘rg‘ontepa tumanlari chegaralarini hamda Andijon viloyatining Bo‘z tumani nomini o‘zgartirish to‘g‘risidagi masalalar qo‘mita tomonidan tuzilgan ishchi guruh tomonidan atroflicha o‘rganildi. Shuningdek, muhokama etilayotgan o‘zgarishlar hududlar aholisi tomonidan ham to‘liq qo‘llab-quvvatlangan.
Senatorlar Namangan viloyatining Namangan shahri, To‘raqo‘rg‘on, Kosonsoy, Namangan va Yangiqo‘rg‘on tumanlari, shuningdek Andijon viloyatining Xonobod shahri va Qo‘rg‘ontepa tumanlari chegaralarini o‘zgartirish to‘g‘risidagi qarorlari loyihalarini ma’qulladi.
Izoh (0)