Toshkentda yuk mashinalariga “stoyanka”lar quriladi

Toshkent shahrida vujudga kelgan noqonuniy to‘xtash joylarining barchasi Transport vazirligi tomonidan o‘rganib chiqildi.

Vazirlik matbuot xizmatining xabar berishicha, o‘rganishlar natijasida, bu joylarda aksariyat hollarda turli shaxslar tomonidan hech qanday ruxsatsiz xizmat ko‘rsatilib, haq olinayotgani, antisanitariya holatlari mavjudligi, haydovchilar va transport vositalar uchun ilk zaruriy sharoitlar (transport vositalarini texnik ko‘rikdan o‘tkazish joyi, haydovchilarni tibbiy ko‘rikdan o‘tkazish joyi, haydovchilar uchun dam olish joylari, transport vositalarini yuvish joylari va hokazo) yo‘qligi aniqlangan.

Ushbu joylar asosida o‘rnatilgan tartibda jihozlangan (avtomobillarni texnik ko‘rikdan va haydovchilarni tibbiy ko‘rikdan o‘tkazish joylari, haydovchilar uchun zarur sharoitlar mavjud), qo‘riqlanadigan, aholiga yuk tashish xizmati bilan shug‘ullanadigan transport vositalari uchun maxsus pullik avtoturargohlar tashkil etish masalasi bo‘yicha Toshkent shahar hokimligiga takliflar kiritilgan.

Qayd etilishicha, hozirgi kunda takliflar tegishli idora va tashkilotlar tomonidan o‘rganib chiqilmoqda.

Transport vazirligi avtomobil turargohlari, kempinglar va boshqa yo‘l bo‘yi infratuzilma obyektlarni barpo etmoqchi bo‘lgan tadbirkorlarga vakolati doirasida yordam ko‘rsatishga tayyor ekanini ma’lum qilgan.