Senatorlar Bo‘z tumani nomini Bo‘ston deb o‘zgartirish to‘g‘risidagi masalani ma’qulladi. Bu haqda “Daryo” muxbiri Musulmonbek Ibrohimov xabar bermoqda.
Oliy Majlisning 12-oktabr kungi 23-yalpi majlisida Andijon viloyati Bo‘z tumani nomini Bo‘ston deb o‘zgartirish to‘g‘risidagi masalani ko‘rib chiqdi.
Majlisda so‘zga chiqqan Andijon viloyati hokimi Shuhratbek Abdurahmonovning ta’kidlashicha, avvallari Bo‘z tumani odam yursa oyog‘i, qush uchsa qanoti kuyadigan joylar bo‘lgan.
“Kelgusi 2020-yilda Bo‘z tumanining 70 yilligi nishonlanadi. Agar ushbu tuman Bo‘ston deb o‘zgartirilsa, to‘yga munosib tuhfa bo‘ladi”, — dedi Andijon viloyati hokimi.
Senatorlar Bo‘z tumani nomini hududning hozirgi kun qiyofasiga mos ravishda Bo‘ston tumani o‘zgartirish taklifni ma’qulladi
Avvalroq, “Andijon viloyatining Bo‘z tumani nomini Bo‘ston tumaniga o‘zgartirish to‘g‘risida”gi Oliy Majlis Qonunchilik palatasining qarori deputatlar tomonidan bir ovozdan ma’qullangandi.
Eslatib o‘tamiz, joriy yilning 16-may kuni Andijonda O‘zbekiston Prezidenti Shavkat Mirziyoyev viloyat faollari, vazirlik va idoralar rahbarlari, nuroniylar, tadbirkorlar, yoshlar ishtirokida yig‘ilish o‘tkazgan edi.
Yig‘ilish davomida Andijon viloyatining cho‘lli hududi hisoblangan Bo‘z tumani hokimi Inomjon Mamadaliyev davlat rahbariga 2020-yilda Bo‘z tumani tashkil topganiga 70 yil to‘lishi, tuman tashkil etilganida uning yerlari sho‘r bo‘lgani uchun shunday nom berilganini, o‘sha paytda Sharof Rashidov “Bu bo‘z yerlar bir kuni bo‘stonga aylanadi” degani, ayni paytda Bo‘zda amalga oshirilayotgan ijobiy o‘zgarishlar natijasida tumanning nomi o‘ziga yarashmay qolgani haqida gapirgan.
Hokim Prezidentdan keyingi yubiley yilida tuman nomini Bo‘stonga almashtirish uchun tuman oqsoqollari, faollari nomidan ruxsat so‘ragan.
Davlat rahbari tumanda ijtimoiy-iqtisodiy obyektlarni rivojlantirish, bunyodkorlik ishlari amalga oshirish va turli sohalardagi ishlarni jadallashtirish uchun 25 milliard so‘m miqdorida mablag‘ ajratib bergan.
Ma’lumot uchun, Andijon viloyatidagi bu tuman 1950-yil 5-aprelda tashkil etilgan. 1962-yil 24-dekabrda Shahrixon tumaniga qo‘shib yuborilgan. 1964-yil 31-dekabrda qayta tuzilgan. Bo‘z tumani shimoli-g‘arbda Ulug‘nor, shimolda Baliqchi, sharqda Shahrixon, janubi-g‘arbda Farg‘ona viloyatining Yozyovon, janubda Qo‘shtepa, janubi-sharqda Quva tumanlari bilan chegaradosh. Maydoni 0,20 ming kvadrat km. Aholisi 70 mingdan ziyod. Bo‘z tumanida 1 shaharcha (Bo‘z) va 3ta qishloq fuqarolar yig‘ini (Mannop Jalolov, Xovos, Xoldevonbek) bor. Markazi — Bo‘z shaharchasi.
Izoh (0)