Сенаторлар иккита шаҳар, бешта туман чегараларини ўзгартириш тўғрисидаги масалани маъқуллади. Бу ҳақда Олий Мажлис Сенатининг 23-ялпи мажлисидан «Дарё» мухбири Мусулмонбек Иброҳимов хабар бермоқда.
Сенат 23-ялпи мажлисида Наманган вилоятининг Наманган шаҳри, Тўрақўрғон, Косонсой, Наманган ва Янгиқўрғон туманлари, Андижон вилоятининг Хонобод шаҳри ва Қўрғонтепа тумани чегараларини ўзгартириш тўғрисидаги масалалар кўриб чиқилди.
Хусусан, Наманган шаҳрининг марказий қисми ва асосий кўчалари шаҳарнинг бош режасига асосан қайта қурилиши натижасида кейинги йилларда шаҳарга туташ бўлган қўшни туманлари, яъни Косонсой, Наманган ва Янгиқўрғон туманлари ҳудудларидан жами 1,039 гектар ер майдонларига шаҳар марказида уй-жойлари бузилишга тушган аҳоли учун янги турар жой мавзеларини барпо этиш учун ажратиб берилди.
Мазкур ҳудудлардаги аҳоли ва ўзини-ўзи бошқариш органлари маъмурий бошқарув тизими бўйича Наманган шаҳрига бўйсунувчи бўлгани ҳолда ер майдонлари ҳозирга қадар туманлар ҳудудига тегишлидир.Бу эса ўз навбатида коммунал хизматлар кўрсатиш, ҳудудларни комплекс ривожлантириш, йўллар ва коммуникацияларни қурилишида бир қатор муаммоларни келтириб чиқармоқда.
Наманган вилояти ҳокими, сенатор Хайрулла Бозоровнинг маълум қилишича, Наманган шаҳрига мазкур туман ҳудудларидан ер майдони қўшиб берилиши биринчи навбатда Наманган шаҳри аҳолисини турмуш тарзини яхшилаш мақсадида келгусида ҳар томонлама қулай кўп қаватли уйлар қурилиши учун муҳим аҳамият касб этади.
Шу сабабли Наманган шаҳри таркибига Тўрақўрғон, Косонсой, Наманган ва Янгиқўрғон туманларининг жами 3,665 гектар ер майдонини ўтказиш назарда тутилмоқда.
Шунингдек, Андижон вилоятининг Хонобод шаҳрига 1972 йилда асос солинган бўлиб, аҳолиси 41 минг кишини, умумий ер майдони 23 квадрат километрни ташкил этади. Бугунги кунда Хонобод шаҳри ҳудуди кичиклиги сабабли ишлаб чиқариш ва хизмат кўрсатиш объектларини барпо этишга етарлича имкон берилмаяпти.
Шу боис Қўрғонтепа туманидаги тўртта – «Султонобод», Хонобод», «Ш.Рашидов» ва «Авазматов» мавзеларида жойлашган жами 1,284 гектар ер майдонини Хонобод шаҳри таркибига ўтказилиши шаҳар аҳолисига қулай шароитлар яратишга ҳамда шаҳарнинг ижтимоий-иқтисодий салоҳиятини ошишига хизмат қилади.
Андижон вилояти ҳокими, сенатор Шуҳрат Абдураҳмоновнинг маълум қилишича, Хонобод шаҳри дастлаб ташкил этилганда аҳоли сони дастлаб 21,5 минг нафар бўлган бўлса, бугунги кунда 41 минг нафарни ташкил этмоқда.
«Хонобод шаҳрида барча коммуникация тармоқларининг мавжудлиги, ишлаб чиқариш ҳамда туристик салоҳиятга эга эканлиги сабабли маҳаллий ҳамда хорижий инвесторлар томонидан мазкур ҳудудга қизиқиш ортиб, ер ажратиш билан боғлиқ муаммолар юзага келмоқда», — деди Андижон вилояти ҳокими.
Жумладан, Хонобод шаҳрига ўтказилаётган ер майдонларининг 492 гектарида дам олиш масканлари, меҳмонхоналар ва кемпинглар, 21 гектарида спорт иншоотлари, 145 гектарида ишлаб чиқариш корхоналари ҳамда 284 гектарида бошқа зарур муҳандислик объектлари, шунингдек, 267 гектарида боғлар ва замонавий иссиқхоналар ташкил этилиши режалаштирилган.
Таъкидланишича, Наманган вилоятининг Наманган шаҳри, Тўрақўрғон, Косонсой, Наманган ва Янгиқўрғон туманлари, шунингдек, Андижон вилоятининг Хонобод шаҳри ва Қўрғонтепа туманлари чегараларини ҳамда Андижон вилоятининг Бўз тумани номини ўзгартириш тўғрисидаги масалалар қўмита томонидан тузилган ишчи гуруҳ томонидан атрофлича ўрганилди. Шунингдек, муҳокама этилаётган ўзгаришлар ҳудудлар аҳолиси томонидан ҳам тўлиқ қўллаб-қувватланган.
Сенаторлар Наманган вилоятининг Наманган шаҳри, Тўрақўрғон, Косонсой, Наманган ва Янгиқўрғон туманлари, шунингдек Андижон вилоятининг Хонобод шаҳри ва Қўрғонтепа туманлари чегараларини ўзгартириш тўғрисидаги қарорлари лойиҳаларини маъқуллади.
Изоҳ (0)