Axborot va ommaviy kommunikatsiyalar agentligida Prezident huzuridagi Strategik va mintaqalararo tadqiqotlar instituti vakillari ishtirokida brifing bo‘lib o‘tdi. Bu haqda agentlik matbuot xizmati ma’lum qildi.
Tadbirda O‘zbekiston Prezidentining Ozarbayjon poytaxti Bokuda 14—15-oktabr kunlari bo‘lib o‘tadigan Turkiy tilli davlatlar hamkorlik kengashining VII sammitidagi ishtirokiga oid ma’lumotlar taqdim etildi. Jurnalistlar O‘zbekiston nega aynan hozir ushbu kengashga a’zo bo‘lishga qaror qilgani bilan qiziqdi.
— Kengashga a’zo bo‘lgach biz Transkaspiy logistika yo‘nalishiga integratsiyalashamiz, bu esa barcha ishtirokchilar uchun manfaatli. Jumladan, Turkiya va Ozarbayjon uchun mahsulotlarini Xitoy va Janubiy Osiyo bozorlariga yetkazib berish yengillashadi. O‘zbekiston, Qirg‘iziston va Qozog‘istonga esa Yevropa hamda Yaqin Sharq bozorlariga kamroq xarajat bilan chiqish imkonini beradi. Shuningdek, madaniy-gumanitar soha, turizmni rivojlantirish bilan bog‘liq masalalar samaraliroq hal etiladi.
Qolaversa, kengashda mamlakatlar o‘rtasida mintaqalararo xavfsizlikni ta’minlash mexanizmlari ham ko‘zda tutilgan. Bu qandaydir harbiy-siyosiy blok emas, balki xavfsizlikni ta’minlovchi huquq-tartibot idoralari va maxsus xizmatlarning o‘zaro hamkorligini anglatadi, — dedi institut direktor o‘rinbosari Sanjar Valiyev.
O‘zbekiston joriy yil 14-oktabr kuni kengashning to‘laqonli a’zosiga aylanadi.
—15-oktabr kuni Bokuda delegatsiyamiz nafaqat ilk bor kengash yig‘ilishida ishtirok etadi, balki mazkur tuzilmani rivojlantirish bo‘yicha qator tashabbuslarni ilgari suradi, — ta’kidladi Sanjar Valiyev. — O‘zbekiston turkiy tilli yirik davlat, biz bu tashkilotdagi aholi soni bo‘yicha Turkiyadan keyingi ikkinchi davlatga aylanamiz. Bizning qo‘shilishimizni barcha a’zo davlatlar, ularning ijro organlari, kotibiyat olqishladi.
Tadbirda Shavkat Mirziyoyevning Bokuga borishi davlat rahbarining Ozarbayjon Respublikasiga ilk tashrifi ekanligi alohida qayd etildi.
Izoh (0)