Ахборот ва оммавий коммуникациялар агентлигида Президент ҳузуридаги Стратегик ва минтақалараро тадқиқотлар институти вакиллари иштирокида брифинг бўлиб ўтди. Бу ҳақда агентлик матбуот хизмати маълум қилди.
Тадбирда Ўзбекистон Президентининг Озарбайжон пойтахти Бокуда 14—15 октябрь кунлари бўлиб ўтадиган Туркий тилли давлатлар ҳамкорлик кенгашининг VII саммитидаги иштирокига оид маълумотлар тақдим этилди. Журналистлар Ўзбекистон нега айнан ҳозир ушбу кенгашга аъзо бўлишга қарор қилгани билан қизиқди.
— Кенгашга аъзо бўлгач биз Транскаспий логистика йўналишига интеграциялашамиз, бу эса барча иштирокчилар учун манфаатли. Жумладан, Туркия ва Озарбайжон учун маҳсулотларини Хитой ва Жанубий Осиё бозорларига етказиб бериш енгиллашади. Ўзбекистон, Қирғизистон ва Қозоғистонга эса Европа ҳамда Яқин Шарқ бозорларига камроқ харажат билан чиқиш имконини беради. Шунингдек, маданий-гуманитар соҳа, туризмни ривожлантириш билан боғлиқ масалалар самаралироқ ҳал этилади.
Қолаверса, кенгашда мамлакатлар ўртасида минтақалараро хавфсизликни таъминлаш механизмлари ҳам кўзда тутилган. Бу қандайдир ҳарбий-сиёсий блок эмас, балки хавфсизликни таъминловчи ҳуқуқ-тартибот идоралари ва махсус хизматларнинг ўзаро ҳамкорлигини англатади, — деди институт директор ўринбосари Санжар Валиев.
Ўзбекистон жорий йил 14 октябрь куни кенгашнинг тўлақонли аъзосига айланади.
—15 октябрь куни Бокуда делегациямиз нафақат илк бор кенгаш йиғилишида иштирок этади, балки мазкур тузилмани ривожлантириш бўйича қатор ташаббусларни илгари суради, — таъкидлади Санжар Валиев. — Ўзбекистон туркий тилли йирик давлат, биз бу ташкилотдаги аҳоли сони бўйича Туркиядан кейинги иккинчи давлатга айланамиз. Бизнинг қўшилишимизни барча аъзо давлатлар, уларнинг ижро органлари, котибият олқишлади.
Тадбирда Шавкат Мирзиёевнинг Бокуга бориши давлат раҳбарининг Озарбайжон Республикасига илк ташрифи эканлиги алоҳида қайд этилди.
Изоҳ (0)