Avvalroq, Samarqand viloyatining Qo‘shrabot tumanida noma’lum ayol maktab o‘quvchisini o‘g‘irlab, uning onasiga tahdid qilgani haqida xabar berilgandi. Bosh prokuratura sodir bo‘lgan mazkur voqeaga munosabat bildirdi.
Ma’lum bo‘lishicha, Qo‘shrabot tumani Qo‘shtamg‘ali qishlog‘ida yashovchi Shoira ismli ayol ariza bilan murojaat qilib, 7-oktabr kuni voyaga yetmagan o‘g‘lini turmush o‘rtog‘i bilan ishqiy munosabatda bo‘lib kelgan Nigora ismli ayol o‘g‘irlab ketganini bildirgan.
Nigora 48-umumta’lim maktabi o‘qituvchilariga o‘zini 1-sinfda o‘qiydigan Saidumarning onasiman deb tanishtirib, uni o‘zining uyiga olib ketgan.
Mazkur holat yuzasidan tuman IIB xodimlari tomonidan olib borilgan tezkor tadbirlar davomida Nigora voyaga yetmagan Saidumarning otasi bilan munosabatlarini tiklash maqsadida uni yashirib qo‘ygani ma’lum bo‘ldi.
Ayni vaqtda bolakay ota-onasining qaramog‘iga qaytarilgan.
Mazkur holat yuzasidan Nigoraga nisbatan Jinoyat kodeksining 137-modda 2-qismi “a” bandi bilan jinoyat ishi ochilgan.
Izoh (0)