Buxoro shahrida yashovchi Mirali Ramazonov hamda Hafiza Davronovaning oilasida uch egizak tug‘ildi. Chaqaloqlarga Shavkat, Mirziyo va Saida ismlari qo‘yildi. Bu haqda “Daryo” muxbiri Laylo Hayitova xabar bermoqda.
Buxoro viloyat Perinatal markazida tug‘ilgan Shavkat 2200 gramm, Mirziyo 2100 gramm hamda Saida 1900 gramm vaznga ega. Uch egizak va onaning ahvoli yaxshi. Ular viloyat bosh akusher-ginekologi Nodir Jo‘rayev, shifokorlar Nasiba Ramazonova hamda Shahob Ismomiddinov nazoratida.
Ota-onaning egizaklardan tashqari, 2015-yilda tug‘ilgan 4 yoshli Shohruh ismli o‘g‘li ham bor. Egizaklarning otasi Mirali Ramazonov “Mening yurtim” telekanalining viloyat bo‘yicha operatori. 2018-yilda “Eng yaxshi foto va video lavhalar” respublika ko‘rik-tanlovida 1-darajali diplom bilan taqdirlangan.
Eslatib o‘tamiz, 2019-yilda Jizzax, Xorazm, Buxoro, Qashqadaryo viloyatlarida tug‘ilgan uch egizaklarga Shavkat, Miromon va Mirziyo ismlari Farg‘onada tug‘ilgan uch egizakka esa Shavkatjon, Ziroatxon va Saidaxon ismlari qo‘yilgan edi. Buxoroda tug‘ilgan Shavkat, Miromon va Mirziyoning otasiga Prezident nomidan Cobalt, Qashqadaryoda tug‘ilgan Shavkat, Miromon va Mirziyolarning otasiga esa Spark berilgan edi. 2018-yilda esa Andijon, Qo‘qon va Toshkentda Shavkat, Miromon va Mirziyolar dunyoga kelgan edi. Andijonlik egizaklarning otasiga Spark, qo‘qonlik va toshkentlik egizaklarning otalariga esa Cobalt sovg‘a qilingan. 2017-yilda esa Xorazm, Qoraqalpog‘iston va Buxoroda tug‘ilgan uch egizaklarga Shavkat, Miromon, Mirziyo ismlari qo‘yilgan.
Izoh (0)