Бухоро шаҳрида яшовчи Мирали Рамазонов ҳамда Ҳафиза Давронованинг оиласида уч эгизак туғилди. Чақалоқларга Шавкат, Мирзиё ва Саида исмлари қўйилди. Бу ҳақда «Дарё» мухбири Лайло Ҳайитова хабар бермоқда.
Бухоро вилоят Перинатал марказида туғилган Шавкат 2200 грамм, Мирзиё 2100 грамм ҳамда Саида 1900 грамм вазнга эга. Уч эгизак ва онанинг аҳволи яхши. Улар вилоят бош акушер-гинекологи Нодир Жўраев, шифокорлар Насиба Рамазонова ҳамда Шаҳоб Исмомиддинов назоратида.
Ота-онанинг эгизаклардан ташқари, 2015 йилда туғилган 4 ёшли Шоҳруҳ исмли ўғли ҳам бор. Эгизакларнинг отаси Мирали Рамазонов «Менинг юртим» телеканалининг вилоят бўйича оператори. 2018 йилда «Энг яхши фото ва видео лавҳалар» республика кўрик-танловида 1-даражали диплом билан тақдирланган.
Эслатиб ўтамиз, 2019 йилда Жиззах, Хоразм, Бухоро, Қашқадарё вилоятларида туғилган уч эгизакларга Шавкат, Миромон ва Мирзиё исмлари Фарғонада туғилган уч эгизакка эса Шавкатжон, Зироатхон ва Саидахон исмлари қўйилган эди. Бухорода туғилган Шавкат, Миромон ва Мирзиёнинг отасига Президент номидан Cobalt, Қашқадарёда туғилган Шавкат, Миромон ва Мирзиёларнинг отасига эса Spark берилган эди. 2018 йилда эса Андижон, Қўқон ва Тошкентда Шавкат, Миромон ва Мирзиёлар дунёга келган эди. Андижонлик эгизакларнинг отасига Spark, қўқонлик ва тошкентлик эгизакларнинг оталарига эса Cobalt совға қилинган. 2017 йилда эса Хоразм, Қорақалпоғистон ва Бухорода туғилган уч эгизакларга Шавкат, Миромон, Мирзиё исмлари қўйилган.
Изоҳ (0)