Elektron sigaretalar ishlab chiqaruvchi Juul kompaniyasiga asos solgan Adam Bouen va Jeyms Monsiz milliarderlar maqomini boy berdi. Bu haqda Meduza xabar bermoqda.
The Wall Street Journal nashriga ko‘ra, Juul investorlaridan biri — Darsana Capital Partners xej-fondi kompaniyaga investitsiyalarining uchdan birini hisobdan chiqardi. Shundan so‘ng uning qiymati 38 milliard dollardan 24 milliard dollargacha kamaydi.
Juul kompaniyasida Bouen va Monsizga 1,75 foizdan ulush to‘g‘ri keladi. Yangi baholashda har biriga 420 million dollardan to‘g‘ri keladi. Altria kompaniyasi Juul’da ulush sotib olganda ularga berilgan 500 million dollarni hisobga olganda ikkovining mol-mulki 900 million dollar atrofida baholanmoqda.
Bouen va Monsiz milliarderlar maqomiga bir yilcha avval, Altria tamaki kompaniyasi 13 milliard dollar evaziga Juul kompaniyasining 35 foiz ulushini sotib olganda ega bo‘lgandi. O‘shanda Forbes ularning boyligini 1,1 milliard dollardan baholagandi.
Elektron sigaretalar chekish bilan bog‘liq kasalliklar va o‘lim holatlari fonida Altria kompaniyasining bozor bahosi 30 milliard dollarga kamaydi.
Eslatib o‘tamiz, 4-oktabr holatiga AQShda veyp chekish oqibatida 1080 nafar kishida aniqlash imkoni bo‘lmagan kasallik qayd etilgan, 18 kishi hayotdan ko‘z yumdi.
Izoh (0)