Fransiya Respublikachilar fraksiyasi rahbari Kristian Yakob Parijdagi politsiya shtab-kvartirasida yuz bergan 4 nafar politsiyachining o‘ldirilishi sabab parlamentda bu ish bo‘yicha tergov komissiyasini tuzishni taklif qildi. U Fransiya ichki ishlar vaziri Kristof Kastanerning iste’fosini talab qilmoqda. Bu haqda Le Figaro xabar tarqatdi.
Seshanbada o‘tadigan prezidentlar konferensiyasida politsiya idorasiga uyushtirilgan hujum bo‘yicha tergov o‘tkazish yuzasidan komissiya tuzishni taklif etaman. Ish juda jiddiy. Bunga mas’uliyat bilan yondashish lozim, chunki masala xavfsizlikka aloqador va razvedka xizmatlari faoliyatiga taalluqli.Kristian Yakob, Fransiya Parlamenti Respublikachilar fraksiyasi rahbari
Mavzuga doir: Parij markazida to‘rt politsiyachi pichoqlab o‘ldirildi
“Ichki ishlar vaziri dastlabki daqiqalarda bizga ‘Jiddiy o‘rganiladigan hech narsa yo‘q!’, — degandi. Kastaner haqiqatni yashirmoqda yoki o‘z lavozimiga noloyiq. U o‘z ishini davom ettirishga munosib emas”, — deya Twitter’da yozgan deputat.
Keyinroq boshqa muxolif deputatlar ham ichki ishlar vaziri iste’fosini talab qilgan.
Eslatib o‘tamiz, Parijda 45 yoshli politsiyachining hamkasblariga keramik pichoq bilan qilgan hujumi natijasida bir nafar administratsiya xodimi va 3 nafar politsiyachi halok bo‘lgan. Hujum uyushtirgan politsiyachi voqea joyida otib o‘ldirilgan. Keyinchalik uning kar-soqov ekani ma’lum qilingan edi. Parij prokuraturasi tergov surishtiruv ishlarini olib borayotganligi xabar qilindi.
Izoh (0)