Электрон сигареталар ишлаб чиқарувчи Juul компаниясига асос солган Адам Боуэн ва Жеймс Монсиз миллиардерлар мақомини бой берди. Бу ҳақда Meduza хабар бермоқда.
The Wall Street Journal нашрига кўра, Juul инвесторларидан бири — Darsana Capital Partners хеж-фонди компанияга инвестицияларининг учдан бирини ҳисобдан чиқарди. Шундан сўнг унинг қиймати 38 миллиард доллардан 24 миллиард долларгача камайди.
Juul компаниясида Боуэн ва Монсизга 1,75 фоиздан улуш тўғри келади. Янги баҳолашда ҳар бирига 420 миллион доллардан тўғри келади. Altria компанияси Juul’да улуш сотиб олганда уларга берилган 500 миллион долларни ҳисобга олганда икковининг мол-мулки 900 миллион доллар атрофида баҳоланмоқда.
Боуэн ва Монсиз миллиардерлар мақомига бир йилча аввал, Altria тамаки компанияси 13 миллиард доллар эвазига Juul компаниясининг 35 фоиз улушини сотиб олганда эга бўлганди. Ўшанда Forbes уларнинг бойлигини 1,1 миллиард доллардан баҳолаганди.
Электрон сигареталар чекиш билан боғлиқ касалликлар ва ўлим ҳолатлари фонида Altria компаниясининг бозор баҳоси 30 миллиард долларга камайди.
Эслатиб ўтамиз, 4 октябрь ҳолатига АҚШда вейп чекиш оқибатида 1080 нафар кишида аниқлаш имкони бўлмаган касаллик қайд этилган, 18 киши ҳаётдан кўз юмди.
Изоҳ (0)