Ukraina Oliy Radasidagi “Xalq xizmatkori” partiyasining bir qator a’zolari partiya siyosatidan hamda rahbariyatning ba’zi qarorlaridan norozi bo‘lmoqda. Bu haqda o‘z nomini oshkor qilishni istamagan deputatga tayanib, “Fakti” nashri xabar berdi.
Ma’lum bo‘lishicha, “Xalq xizmatkori” partiyasining bir guruh deputatlari Ukraina prezidenti Vladimir Zelenskiyning qilayotgan ishlariga qo‘shilmaydi hamda Oliy Radadagi ishning ba’zi jihatlaridan norozi. Ta’kidlanishicha, dastlabki kelishmovchiliklar qo‘mitalarda lavozimlarning taqsimlanishi jarayonida boshlangan. Barchasi shoshilinch tarzda o‘tgani sababli, partiya rahbariyati norozi deputatlarga “ma’naviy zararni” to‘lab berishni va’da qilgan.
Deputatlar kompensatsiyani 2020-yilning budjetini taqsimlash jarayonida olishni kutgan, biroq hamma ham o‘z okrugi uchun zarur hajmda mablag‘ ajratilishiga erisha olmagan, bu esa partiyada “tarqoqlik”ning yuzaga kelishiga sabab bo‘lgan. Manbaning xabar berishicha, ayni paytda gap 12—15 nafar norozi deputat haqida ketmoqda, biroq noroziliklar uchun sabablar ko‘paymoqda. Bunday sabablardan biri sifatida “Shtaynmayer formulasi” ko‘rsatilmoqda.
1-oktabr, seshanba kuni Ukraina va mustaqil Donbass respublikasi “Shtaynmayer formulasi”ni imzoladi. Hujjat Donbassga alohida maqom berish, ehtimoliy amnistiya va respublikalarda saylovlar o‘tkazish mexanizmini belgilab beradi. Taxmin qilinishicha, ovoz berish kunida hududning alohida maqomi to‘g‘risidagi qonun vaqtinchalik asosda ishlashni boshlaydi. YeXHT tomonidan saylovlarning qonuniyligi tasdiqlanganidan so‘ng, qonun doimiy asosda kuchga kiradi.
Ukraina parlamentiga saylov 21-iyulda bo‘lib o‘tgan edi. Ovozlar to‘liq hisoblab chiqilganidan so‘ng, Vladimir Zelenskiyning “Xalq xizmatlori” partiyasi 450 ta o‘rindan 254 tasini egallagani ma’lum bo‘ldi.
Izoh (0)