Украина Олий Радасидаги «Халқ хизматкори» партиясининг бир қатор аъзолари партия сиёсатидан ҳамда раҳбариятнинг баъзи қарорларидан норози бўлмоқда. Бу ҳақда ўз номини ошкор қилишни истамаган депутатга таяниб, «Факти» нашри хабар берди.
Маълум бўлишича, «Халқ хизматкори» партиясининг бир гуруҳ депутатлари Украина президенти Владимир Зеленскийнинг қилаётган ишларига қўшилмайди ҳамда Олий Рададаги ишнинг баъзи жиҳатларидан норози. Таъкидланишича, дастлабки келишмовчиликлар қўмиталарда лавозимларнинг тақсимланиши жараёнида бошланган. Барчаси шошилинч тарзда ўтгани сабабли, партия раҳбарияти норози депутатларга «маънавий зарарни» тўлаб беришни ваъда қилган.
Депутатлар компенсацияни 2020 йилнинг бюджетини тақсимлаш жараёнида олишни кутган, бироқ ҳамма ҳам ўз округи учун зарур ҳажмда маблағ ажратилишига эриша олмаган, бу эса партияда «тарқоқлик»нинг юзага келишига сабаб бўлган. Манбанинг хабар беришича, айни пайтда гап 12—15 нафар норози депутат ҳақида кетмоқда, бироқ норозиликлар учун сабаблар кўпаймоқда. Бундай сабаблардан бири сифатида «Штайнмайер формуласи» кўрсатилмоқда.
1 октябрь, сешанба куни Украина ва мустақил Донбасс республикаси «Штайнмайер формуласи»ни имзолади. Ҳужжат Донбассга алоҳида мақом бериш, эҳтимолий амнистия ва республикаларда сайловлар ўтказиш механизмини белгилаб беради. Тахмин қилинишича, овоз бериш кунида ҳудуднинг алоҳида мақоми тўғрисидаги қонун вақтинчалик асосда ишлашни бошлайди. ЕХҲТ томонидан сайловларнинг қонунийлиги тасдиқланганидан сўнг, қонун доимий асосда кучга киради.
Украина парламентига сайлов 21 июлда бўлиб ўтган эди. Овозлар тўлиқ ҳисоблаб чиқилганидан сўнг, Владимир Зеленскийнинг «Халқ хизматлори» партияси 450 та ўриндан 254 тасини эгаллагани маълум бўлди.
Изоҳ (0)