9—21-sentabr kunlari Rossiyaning Yekaterinburg shahrida bo‘lib o‘tgan boks bo‘yicha Jahon chempionati oltin medal sovrindori Mirazizbek Mirzahalilovga viloyat hokimligi tomonidan Farg‘ona shahar markazidan yangi xonadon sovg‘a qilindi, deb xabar bermoqda “Daryo” muxbiri.
Nufuzli musobaqada -57 kg vazn toifasida ringga ko‘tarilgan Mirazizbek Mirzahalilov final uchrashuvida uch karra Jahon chempioni va Olimpiada o‘yinlari sovrindori kubalik raqibini mag‘lub etib, Jahon chempioni bo‘lgandi.
Avvalroq Mirazizbek Mirzahalilov O‘zbekiston Prezidentining farmoni bilan “O‘zbekiston iftixori” unvoni bilan taqdirlangandi.
“Xalqning olqishida, Prezident e’tirofida bo‘lish juda katta baxt ekan. Viloyat hokimining yangi xonadon sovg‘asini hech kutmagandim. Yangi uyda zamonaviy mebel jihozlaridan boshlab, televizor, muzlatgich, qo‘yingki, hamma narsa bor. Albatta biz sportchilarga bildirilayotgan ishonch hamda ko‘rsatilayotgan e’tibor yanada kuch-quvvat bag‘ishlaydi”, — deydi Mirzahalilov.
Ma’lumot uchun, o‘zbekistonlik bokschilar Jahon chempionatida 3 ta oltin, 1 ta kumush va 1 ta bronza medal bilan umumjamoa hisobida birinchi o‘rinni qo‘lga kiritgandi.
Eslatib o‘tamiz, avvalroq Mirzahalilovga Chevrolet Tracker ham topshirilgandi. Undan oldin esa yana bir Jahon chempioni Bahodir Jalolovga Toshkentdan uy sovg‘a qilingandi.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @daryo_sport’ga obuna bo‘ling!
Izoh (0)