APLda atigi 12 daqiqa o‘ynab, keraksizga chiqarilgan, Shimoliy Londonni “qon”ga bo‘yagan “Bavariya” javohiri Serj Gnabri haqida hikoya

To‘rt yil oldin Toni Pulis “Arsenal”dan ijraraga olingan Gnabrini “Vest Bromvich”da keraksizga chiqargandi:

“Serj o‘ynashni xohlaydi, biroq u bu darajada to‘p sura olmaydi. U akademiyadan kelgan o‘yinchi va deyarli APLda maydonga tushmagan. Akademiyalar Premyer Liga darajasidagi futbolchilarni yetishtirib beradimi? O‘ta qiyin masala, axir bu Premyer Liga”.

2015-yil Gnabri Angliya Premyer Ligasida atigi 12 daqiqani maydonda o‘tkazdi. 2015/16-yilgi mavsum yakuniga yetgach, germaniyalik futbolchi “Arsenal” bilan shartnomani uzaytirishdan bosh tortdi. Uyga qaytganidan bir necha yil o‘tib, APLga to‘g‘ri kelmagan iste’dod sohibi kimsan “Bavariya”ning yangi yetakchisiga aylandi. Angliya qaytib esa u jamoasi bilan kimsan o‘tgan yilgi Yevropa Chempionlar Ligasi vitse-chempioni “Tottenhem”ni yakson qildi. Shimoliy London “qon”ga bo‘yaldi.  To‘g‘ri, bu ishni Serjning bitta o‘zi qilmadi. Ammo Londondagi kechada bu ishni xuddiki Gnabrining o‘zi qilgandek tasavvur uyg‘ondi.

“Arsenal” muxlislari esa Serjning ketganidan zarracha achinish hissini tuyayotgani yo‘q. Biroq ular shunday iqtidorning qo‘ldan ketishida klub menejmenti hamda Arsen Vengerni ayblashdan o‘zini tiyishayotgani yo‘qligi ham bor gap. Serj Germaniyaga ketganidan so‘ng ham “Arsenal” uchun nimadir qila oldi. Bunda uning faqatgina “Tottenhem” urgan to‘rtta goli nazarda tutilmayapti. U shunday katta o‘sishga erishdi: “Vest Bromvich” safidagi 12 daqiqadan so‘ng u Bundesliga juda tez moslashdi. Va Toni Pulisning ham daraja borasidagi fikrlari va “Arsenal”ning yoshlar bilan ishlash borasidagi qarashlarini chippakka chiqargandek bo‘ldi.

Bunga yaqqol isbot sifatida “Arsenal” tarbiyalanuvchilarining so‘nggi uch yil ichida APLdan boshqa har qanday ligada tajriba oshira olayotgani va o‘z o‘rnini topib borayotganini ko‘rsatish mumkin.

Gnabriga yoshligida ham katta iqtidor sohibi sifatida qaralgan. “Arsenal”da ham shunday edi. Shunday o‘rinlar bo‘ldiki, Arsen Venger Gnabrini Teo Uolkottga ham qiyosladi. Lekin iqtidorining yuzaga chiqishi uchun Serj butun hayot tarziga bo‘lgan munosabatlarini o‘zgartirishga majbur bo‘ldi.

Rio Olimpiadasi Gnabrining kayfiyatini o‘zgartidi. Shundan so‘ng u “Arsenal”dan ketdi

Ba’zan oldinga to‘g‘ri qadam tashlash uchun bir nechta oddiy narsa bajarish talab etiladi. Tashqaridan qaraganda o‘sha oddiy narsa ham aslida keraksizdek ko‘rinadi. Gnabri uchun esa bu narsa o‘yindan rohatlanish bo‘ldi.

2016-yil avgustiga qadar Serj futbolni deyarli unutayozdi. U sakkiz oy davomida maydonda ko‘rinish bermadi. Ungacha esa bir yil davomida tizzasidan olgan jarohatini davolash bilan band bo‘ldi. Umumiy hisobda 2,5 yil ichida atigi 137 daqiqa maydonda harakat qildi. Ammo shunga qaramay Germaniya yoshlar terma jamoasi ustozi Horst Hrebush unig Riodagi Olimpada o‘yinlariga jamoa bilan olib ketdi. Aslida Gnabri Leon Goretska hamda Yulian Brandtlarga o‘rinbosar sifatida termaga jalb etilgandi. Biroq Goretska Meksikaga qarshi Olimpiadaning ilk bellashuvidayoq jarohat oldi. Aynan shu daqiqalardan boshlab Gnabrining vaqti yetganligi oydinlashdi. U maydonga tushib, meksikaliklar darvozasini ham ishg‘ol qildi. Navbatdagi ikkita o‘yinda ikkitadan gol urib, Germaniyani chorak finalga olib chiqdi. Chorak finalda esa Portugaliya taslim etildi. Serj esa oltita o‘yinda oltita gol urib Olimpiadaning eng yaxshi to‘purari bo‘ldi, Germaniya esa musobaqani bronza medali bilan yakunladi.

“Angliyadagi vaziyatim bilan qiyoslaydigan bo‘lsak, aqlga sig‘mas darajadagi kontrast holatidaman. Futbolda hammasi oddiy: agar siz o‘ynasangiz, gol urasiz. Ular siz haqingizda gapiradi, sizga qiziqadi. Rioda men katta futbolga qaytdim”, — degan edi musobaqadan so‘ng Gnabrining o‘zi.

Nemis futbolchisi Londonga qaytishni xohlamadi va transferlar oynsaining so‘nggi kunida “Verder” a’zosiga aylandi.

Gnabri mashg‘ulotlarga va yugurishga bo‘lgan munosabatini o‘zgartirdi. Unga Mertezakkerni davolagan kompaniya yordam berdi

“Arsenal”dan ketib to‘g‘ri qildim. Angliyadagi holatim bilan bu yerdagi to‘rt oy ichida yuz bergan o‘zgarishlarni kuzatgan inson fikrimga qo‘shilsa kerak. Menga o‘yin amaliyoti kerak edi. London klubi meni olib qolmoqchi bo‘ldi, biroq men ham o‘zim va rivojlanishim haqida o‘ylashim kerak edi”.

Futbolchi o‘zi ta’kidlaganidek, o‘yin amaliyoti uning rivojlanishi yo‘lida ikkinchi asosiy sabab vazifasini o‘tadi. Birinchisi esa — tizzasini to‘liq davolanishi.

Olimpiadadan oldin Gnabri Bondda mashg‘ulot yig‘inlarida ishtirok etdi. Ammo u na klub va na terma jamoa bilan shug‘ullandi. Uning mashg‘ulotlarini Focus-on-Performance kompaniyasidan bo‘lgan mutaxassislar olib bordi. Mazkur kompaniya vakillari vaqtida og‘ir jarohat olgan Pyer Mertezakkerni ham maydonga qaytishiga sababchi bo‘lgandi. Gnabri ham agenti orqali ushbu mutaxassislarga duch keldi. Qayd etish joiz, Pyer va Serjning ham agenti bir edi.

Focus-on-Performance asoschisi Martin Veddemann tayyorgarlik jarayonlariga yangicha qarashni joriy etdi: u neyrobiologiya hamda biomexanikani birlashtirib, uni neyroatletika deb atadi. Neyroatletika esa to‘g‘ri harakatlanish dasturi, neyromuskullar aloqasining rivojlanishi hamda organizmdagi barcha jarayonlar ustidan nazoratni o‘rnatishdan iborat edi.

“Jarohatdan so‘ng Serjni davolagan “Arsenal” shifokorlari uning uchun yangi harakat ko‘nikmalarini yaratishi lozim edi. Bu miya uchun harakat reflekslarini boshqaradigan dastur bo‘lishi kerak edi. Biroq ular bunga e’tibor qaratmagan. Aksincha, to‘qimalarning tezroq tiklanishini nazoratga olgan. Ammo buning o‘zi yetarli emas. Biz miya nima qilayotganini bilishimiz kerak edi. Aynan u hammasini boshqaradi. Agar siz tanangizni to‘liq nazorat qila olmasangiz, maydonda maksimum kuch bilan harakat qila olmaysiz”, — degan edi Veddemann.

Ta’kidlash joiz, Martin Gnabrini qayta dasturlashtirdi. Uni yugurish jarayonida tizzasini xavfsiz qo‘yish, zarba berishdan oldin tanani tik tutish va kuch tortishi markazini yuqori tezlikda ham boshqara olishni o‘rgatdi. So‘nggi uch yil ichida Serj tizzasi atigi bir marta bezovta qildi, xolos. Shunda ham u bor-yo‘g‘i to‘rt kunni maydonda tashqarida o‘tkazdi. 2016-yilga qadar esa Gnabri aynan tizzasi sabab bir necha oy va hatto yillab shug‘ullana olmagandi.

“Angliyada Gnabrining tizzasi va bog‘lovchi mushaklari bilan bog‘liq muammolari bo‘lgan. O‘tgan yozda esa uning umidi so‘la yozgandi. Hozir bo‘lsa, Serj neyroatletika sabab ancha yaxshi holatda”, — degandi o‘sha vaqtlarda Veddemann.

Gnabri Common Goal’ga qo‘shildi, vegetarianga aylanib, yoga bilan shug‘ullandi

Focus-on-Performance yigitlari bilan tanishuv Gnabrini tubdan o‘zgartirib yubordi. Mushaklarini mustahkamlash maqsadida Serj shaxsiy murabbiy bilan yoga mashg‘ulotlarini olib bordi. Bundan tashqari haftada bir marta Germaniyada birinchi raqamli fizioterapevt Lars Linhard bilan ham shug‘ullandi. Ular birgalikda miya va mushaklar aloqasi, reaksiya va koordinatsiyalarni yaxshilash ustida ishlaydi. Shuningdek, uxlash rejimini ham o‘zgartirdi, kamiga kutilmagan hobbi topdi:

“Qo‘llarim oyoqlarimdek tezkor emas. Ammo fortepyano hamda futbolning o‘zaro qandaydir o‘xshashligi bor. Fortepyanoda yangi pyesani o‘rganish futboldagi mashg‘ulotlarni eslatib yuboradi. Futbolda ham nimanidir yaxshi qilsangiz, juda ham kuchli bo‘lishingiz mumkin. Fortepyanoda ham shunday”, — degandi Gnabri o‘zining yangi hobbisi haqida.

Serj yanvar oyida go‘sh iste’molidan voz kechib, no‘xot hamda yasmiq donini tanladi. So‘nggi yillarda Kris Smolling, Ektor Belyerin kabi futbolchilar ham vegetarianga aylandi. Ularning so‘zlariga ko‘ra, bu jarayon ular oyoq paylariga katta kuch qo‘shgan. Gnabri haqida esa uning natijalari so‘zlaydi: o‘tgan mavsumning ikkinchi qismida 9 ta gol urdi (birinchi davrada esa atigi 4 ta gol urgandi). Ammo bu tajriba uzoq davom etmadi. Futbolchi yaqinda ba’zan go‘sht iste’mol qilib turishini ham tan oldi.

Gnabrining hayotida futboldan boshqa narsalar ham bor. U 2017-yilda Germaniyada Common Goal’ga a’zo bo‘ldi. Bu degani uning maoshidan 1 foizi doimo xayriyaga yo‘naltiriladi. Bu futbolchi uchun haqiqiy ish prinsipi:

“Qaror yurakdan chiqadi. Asosiy sabablardan biri mening otam asli Kot-D’Ivuardan bo‘lganidir. Men ivuarliklarning qanday yashayotganligiga befarq qarab tura olmayman. U yerda bo‘lganman. Shuning uchun ularga yordam berishni, nimadir qilishni xohlayman. Hashamatli hayot tarzini esa hamma har xil tushunadi. Kimdir uchun bu tilladan qilingan qimmatbaho mashina. Men uchun esa futbolning o‘zi yetarli”, — Serjning o‘zi.

Serj — “Bavariya”ning kelajagi

“Bavariya”dagi tanishtiruv marosimiga Gnabri Gucci brendi ostidagi o‘z vaqtida mashhur basketbolchi Lebron Jeyms kiygan qizil-oq rangli libosda kelgandi. 2018/19-yilgi mavsum yakuniga ko‘ra, myunxenlik muxlsilar Serjni klubning mavsumdagi eng yaxshi o‘yinchisi sifatida e’tirof etdi. Bu mavsum esa uning uchun yanada yaxshi boshlanganini “Tottenhem” darvozasidan o‘rin olgan to‘rtta gol ham aytib turibdi. To‘g‘ri, Gnabri futbol uchun Lebron bo‘la olmaydi. Ammo “Bavariya” uchun... Klubldagilar esa Robben va Riberining merosxo‘ri borasida allaqachon tashvishlanmay qolgani ham ayni haqiqat. Axir Serj endigina 24 yoshda!