Avvalroq Ijtimoiy tarmoqlarda shifokor-kardiolog Jahongir Hojiyev o‘zining kaltaklanganiga oid ma’lumotlar qoldirgani haqida xabar berilgan edi.
Keyinroq Sog‘liqni saqlash vaziri Alisher Shodmonov Jahongir Hojiyevning holidan xabar olgan hamda tibbiyot xodimiga nisbatan sodir etilayotgan har bir noqonuniy xatti-harakatlar uchun qat’iy javobgarlikni kuchaytirish barobarida uni nazoratga olish kerakligi bo‘yicha Bosh prokuraturaga murojaat qilgan edi.
Toshkent shahar IIBB matbuot xizmatining xabar berishicha, ushbu holat yuzasidan jinoyat ishi qo‘zg‘atilgan.
“Aniqlanishicha, Jahongir H. o‘z xizmat vazifalarini bajarish davomida 21 yoshli feldsher bilan birga chaqiruv tomon yo‘l olgan. Yetib kelishgach, o‘zini yomon his qilayotgan Dildora M.ga ukol qilib, uni shifoxonaga yetkazishdi. Qizning shifoxonaga mast holatda kelgan 29 yoshli akasi Mirhayot M. avval shifokorlarni haqorat qilib, so‘ng Jahongir H.ni urgan.
Ushbu fakt asosida O‘zbekiston Respublikasi Jinoyat kodeksining 277-moddasi (Bezorilik) bo‘yicha jinoiy ish qo‘zg‘atildi”, — deyiladi poytaxt IIBB xabarida.
Izoh (0)