Buxoro viloyatining Kogon tumanida maktab o‘quvchilari paxta terimiga jalb etilmoqda. Bu haqda Repost o‘z manbalariga asoslanib xabar berdi.
Qayd etilishicha, paxta dalasiga beshinchi va undan yuqori sinf o‘quvchilari olib chiqilgan.
Mavzuga doir: O‘nlab ichki ishlar xodimlari majburiy paxta terimiga qarshi norozlik bildirishmoqda (video)
“Alinoz Sherginoz” va “Barno Bahrom” fermer xo‘jaliklariga tegishli paxta dalalarida 13 nafar beshinchi va undan yuqori sinf o‘quvchilari paxta terayotgan bo‘lgan.
“Otam o‘sha kuni ‘Tonyiroq’ mahallasiga ketayotgan edi. Yo‘lda u qishloq aholisi va fermerlar bilan birga paxta terayotgan bolalarni ko‘rib qoladi. Otamning bolalarga ‘Siz ota-onangizga yordam berishga chiqdingizmi, qayerda o‘qiysiz?’ degan savoliga bolalar maktabdan paxtaga chiqarilganini aytgan. Paxta dalasida 15-maktab ma’muriyati vakillari ham bo‘lgan. Otam bolalardan nechanchi sinfda o‘qishini so‘ragan. U yerda beshinchi, oltinchi va yuqori sinf o‘quvchilari ham bo‘lgan.
Maktab o‘quvchilarining paxta terayotgani aks etgan suratlar kunduzgi soat 11—12 atrofida olingan.
Fermerlar otamdan ushbu suratlarni hech qayerga tarqatmaslikni so‘ragan. Keyinroq ular bolalarning Kogon tumani hokimi Yo‘ldosh Jumayev buyrug‘i hamda Kogon tumani xalq ta’limi boshqarmasi ko‘rsatmasi bilan paxta dalasiga olib chiqilganini tan olgan.
Mavzuga doir: Ichki ishlar vazirligi o‘z xodimlarining paxtaga chiqmaslik bo‘yicha noroziligiga munosabat bildirdi
Manbaning xabar berishicha, bolalar paxta dalasiga dam olish va bayram kunlari olib chiqilmoqda.
1-oktabr kuni esa manbaning o‘zi bir necha fermer xo‘jaliklarida 17 nafar bola paxta terayotganining guvohi bo‘lgan.
Nashr Buxoro viloyati, Kogon tumani hokimligi hamda 15-maktab ma’muriyati bilan bog‘lanishga urinib ko‘rdi. Biroq harakatlar besamar ketgan.
Izoh (0)