Fransiya matbuoti xabarlariga ko‘ra, pichoq bilan qurollangan shaxs mamlakat poytaxti Parijdagi markaziy politsiya idorasida to‘rt nafar politsiya zobitini pichoqlab o‘ldirgan, deb yozmoqda BBC.
Hujumchining ismi oshkor etilmayapti, ammo uning 45 yoshda ekanligi va Parij politsiyasida 20 yil ishlagani hamda hujumdan so‘ng politsiya tomonidan otib o‘ldirilgani xabar qilinmoqda. Parij markazidagi hudud politsiya kuchlari tomonidan o‘rab olingan. Xabarlarga ko‘ra, yana bir kishi jarohatlangan.
Ushbu hujum butun Fransiya bo‘ylab politsiya xodimlari ish tashlagan kundan bir kun o‘tib ro‘y berdi.Bir kun oldingi ish tashlashda politsiyachilar o‘zlariga nisbatan zo‘ravonliklar ko‘payib borayotganidan norozilik bildirgan.
BBC tomonidan xabar berilishicha, hodisa mahalliy vaqt bilan soat 13:00 da yuz bergan. Hujum ro‘y bergan joyga prezident Emmanuel Makron, bosh vazir Eduard Filipp, Ichki ishlar vaziri Kristof Kastaner tashrif buyurgan.
2017-yilda Fransiya politsiyasi xodimi Parijdagi Notr-Dam cherkovi yaqinidagi maydonda hujumga uchragan edi. Mazkur hujum Fransiya prokuraturasi tomonidan terakt deb baholangan edi.
Parijda 2015-yilning 13-noyabr kuni teraktlar ketma-ketligi sodir etilib, qo‘poruvchilik harakatlari oqibatida 130 kishi halok bo‘lgan, 352 kishi yaralangan edi.
Izoh (0)