Ketdi-ketmadi... Komil Allamjonov Olmazor tumani hokimi o‘rinbosari ishdan bo‘shatilganini tasdiqladi

“Kun.uz” xodimlariga zo‘ravonlik qilgan Olmazor tumani hokim o‘rinbosari Abdurasul Vahobov ishdan ketganini Axborot va ommaviy kommunikatsiyalar agentligi bosh direktori Komil Allamjonov tasdiqladi.

“Xabaringiz bor, bugun «Kun.uz” muxbiriga hujum qilgan Olmazor tumani hokimi o‘rinbosari Abdurasul Vahabov o‘z lavozimidan ozod qilindi. Shu munosabat bilan biz yana bir bor ta’kidlaymizki, Axborot va ommaviy kommunikatsiyalar agentligi har bir jurnalist va blogerni uning huquqlari buzilishidan himoya qilishni davom ettiradi”, — deyiladi xabarda.

“Kun.uz”ning Bosh prokuraturadagi manbasiga ko‘ra, Toshkent shahar prokurori tomonidan mazkur holat yuzasidan Toshkent shahar hokimi nomiga taqdimnoma kiritilgan, taqdimnoma ko‘rib chiqilishi natijasiga ko‘ra Vahobov egallab turgan lavozimidan ozod etilgan.

Qo‘shimcha qilinishicha, boshqa holatlar yuzasidan Toshkent shahar prokuraturasi tomonidan qo‘shimcha tekshirish harakatlari davom etmoqda. Ya’ni, Bosh prokuratura shahar prokuraturasining jinoiy ish qo‘zg‘atishni rad etish to‘g‘risidagi qarorini bekor qilib, ishni qaytadan ko‘rib chiqish bo‘yicha topshiriq bergan.

Olmazor tuman hokimi o‘rinbosari Abdurasul Vahobov 14-avgust kuni “Kun.uz” xodimlariga tahdid qilgandi. Oradan bir kun o‘tib Toshkent shahar hokimligi matbuot xizmati tomonidan Vahobovning videointervyusi e’lon qilindi va unda hokim o‘rinbosari “Kun.uz” muxbiri Rahmatilla Isroilov muqaddam undan tamagirlik yo‘li bilan yer talab qilgani va buning evaziga katta miqdorda pora taklif etgani haqidagi da’voni ilgari surgan edi.