Qashqadaryoda 100 dan ortiq noyob tog‘ archalari kesilgani aniqlandi

Qashqadaryo viloyati davlat o‘rmon xo‘jaligining “Qiziltom” o‘rmon bo‘limi hududlarida noyob tog‘ archalari kesilgani aniqlandi, deb xabar bermoqda Davlat ekologiya qo‘mitasi matbuot xizmati.

Qashqadaryo viloyati Ekologiya va atrof-muhitni muhofaza qilish boshqarmasi inspektorlari 23-sentabr, dushanba kuni “Qiziltom” o‘rmon bo‘limi hududlarida o‘rmon qoidabuzarliklariga qarshi kurashish maqsadida nazorat tadbiri o‘tkazgan. Unda Qashqadaryo davlat o‘rmon xo‘jaligi mutasaddilarining o‘z ishiga e’tiborsizligi hamda mas’ulyatsizligi oqibatida qator qonun buzilish holatlari sodir etilganligi aniqlangan.

• mahalliy nomi “Zardolisoy” massivida 16,1—20 santimetrlik 30 tup, 20,1—24 santimetrlik 12 tup tabiiy o‘sgan zarafshon archa daraxtlari tag qismidan kesilganligi;
• mahalliy nomi “Almardon” bo‘lgan massivda 16,1—20 santimetrlik 19 tup, 12 santimetrlik 7 tup zarafshon archa daraxtlari tag qismidan kesib, tana qismini archib, yog‘och qilib tayyorlab qo‘yilganligi;
• mahalliy nomi “Sho‘rbuloq” massivining yuqori qismida 8,1—12 santimetrlik 15 tup, 12,1—16 santimetrlik 18 tup zarafshon archa daraxtlari tag qismidan kesib, yog‘och qilib tayyorlab qo‘yilganligi holatlari aniqlangan va bu haqda dalolatnoma rasmiylashtirilgan.

Vazirlar Mahkamasining 2014-yil 20-oktabrdagi qarori bilan tasdiqlangan “O‘simlik dunyosi obyektlaridan foydalanish va o‘simlik dunyosi obyektlaridan foydalanish sohasida ruxsat berish tartib-taomillaridan o‘tish tartibi to‘g‘risidagi nizom”ning 14-ilovasiga asosan tabiatga, o‘simlik dunyosiga yetkazilgan zarar miqdori 129 million 228 ming 500 so‘mni tashkil qildi.

“Yuqorida aniqlangan holatlar bo‘yicha belgilangan tartibda chora ko‘rish uchun to‘plangan hujjatlar huquqni muhofaza qilish organlariga taqdim qilish uchun rasmiylashtirilmoqda”, — deyiladi xabarda.