Xorazmning “Hazorasp—Bo‘ston” yo‘nalishida avtobus qatnovi yo‘lga qo‘yilmagani aholi noroziligiga sabab bo‘lmoqda, deb yozmoqda “Xabar.uz”.
Bo‘ston qishlog‘i Hazoraspning Amudaryo sohiliga tutash, markazdan olisroqda joylashgan hudud sanaladi. Bu yerda 10 000 ga yaqin aholi istiqomat qiladi.
— Ko‘pchilik bolalar tuman markazidagi maktab-internatlari yoki kasb-hunar kollejlariga taksida qatnab o‘qishadi. Taksi yo‘l kira haqi esa qimmat. Agar qishlog‘imizda avtobus qatnovi yo‘lga qo‘yilsa, yoshlarimiz uchun katta bir imkoniyat yaratilgan bo‘lar edi, — deydi “Qovunchi” mahallasida yashovchi fuqaro G.Qadamboyeva.
Bir paytlar ushbu hududga “Hazorasp—Otov” yo‘nalishida avtobus va marshrutkalar qatnagan ekan. Otov — Bo‘ston qishlog‘iga qo‘shni bo‘lgan Bog‘ot tumaniga qarashli hudud. Bundan kelib chiqadiki, Bog‘ot tumanining “Qipchoq”, “Bo‘ka” va “To‘pchi” mahallalaridan ham o‘g‘il-qizlar Hazorasp tumani markaziga qatnab o‘qiydi. Shuningdek, bu hududda markazga ishga qatnovchilar ham talaygina.
— Odam degani issiq jon. Kimdir kasal bo‘lib shifoxonaga qatnaydi. Kimdir yotib davolanayotgan yaqinlarini ko‘rgani boradi. Avtobus yo‘qligidan oddiy xalq juda qiynaladi, — deydi yana G.Qadamboyeva.
— Avtobus qatnovini yo‘lga qo‘yishni talab qilib, bir necha yildan buyon tegishli mutasaddi tashkilotlarga murojaat qilib kelamiz, — deydi bog‘otlik fuqaro N.Ro‘zimov.
— Oldiniga faqat Hazorasp tumani markazida bozor bo‘lishi inobatga olinib, seshanba, payshanba, shanba va yakshanba kunlari avtobus qatnovi yo‘lga qo‘yildi. Shunisiga ham rozi edik, ammo bu qatnov ham to‘xtatib qo‘yilganiga 5—6 yil bo‘ldi.
Qayd etilishicha, Hazorasp tumani “Qovunchi” mahallasida yashovchilar sektor rahbarlari va boshqa mutasaddilar bilan bo‘lib o‘tayotgan uchrashuv va qabullarda bu masalani ko‘p bora o‘rtaga tashlagan. Biroq bu talab va takliflarga jiddiy e’tibor qaratmagani sababli muammo ochiqligicha turibdi.
Izoh (0)