Sog‘liqni saqlash vazirligi Chustdagi to‘yda ovqatdan zaharlangan 18 kishi sog‘lomlashtirilib, uyga javob berilganini ma’lum qildi

Namangan viloyati Chust tumani G‘ova qishlog‘ida 21-sentabr, shanba kuni o‘tkazilgan to‘yda 18 nafar fuqaro ovqatdan zaharlangani haqida xabar berilgan edi. Sog‘liqni saqlash vazirligi mazkur holat yuzasidan o‘rganish o‘tkazdi.

21-sentabr kuni Namangan viloyati Chust tumani “G‘ova” MFY hududidan 18 nafar fuqaro qorinda og‘riq, ko‘ngil aynishi, umumiy holsizlik, ich ketishi, tana haroratining ko‘tarilishi belgilari bilan tuman tibbiyot birlashmasi yuqumli kasalliklar shifoxonasiga murojaat qilgan. Ular “o‘tkir diareya” tashxisi bilan shifoxonaga yotqizildi.

Bemorlarning 5 nafari erkaklar va 13 nafari ayollar bo‘lgan. Ularning aytishicha, “G‘ova” MFYda yashovchi N.Sh.ning to‘y bazmida qatnashgandan so‘ng, kasallik alomatlari boshlangan.

Shifoxonaga yotqizilgan bemorlardan bakteriologik tekshiruv uchun qon, axlat, siydik namunalari olinib, tuman DSENMga yuborilgan. Barcha bemorlar shifokorlar tomonidan chuqur tibbiy ko‘rikdan o‘tkazilib, kerakli tavsiflar berilgan. Bemorlarni davolash ishlari qat’i nazoratga olinib, yetarli darajada dori-darmonlar bilan ta’minlangan.

Ertasi kuni o‘tkazilgan tibbiy muolajalardan so‘ng holati yaxshilangan 3 nafar bemorga uyiga javob berildi. 24-sentabr, seshanba kuni esa barcha bemorlar sog‘lomlashtirilib, uyiga javob berilgan.

Epidemiologik surishtiruv natijasida quyidagilar ma’lum bo‘ldi:

G‘ova qishlog‘ida yashovchi fuqaro N.Sh. uyida o‘tkaziladigan to‘y marosimi uchun buzoq so‘ygan, uning go‘shtidan yaxna tayyorlagan. Ushbu yaxna go‘shtdan iste’mol qilgan to‘y egasi o‘g‘lining ham kechki paytda tana harorati ko‘tarilgan, G‘ova QOP qoshidagi tez yordam xodimlari muolajasidan so‘ng ahvoli yaxshilangan.

Surishtiruv davomida to‘y uchun so‘yilgan buzoq go‘shti, ovqat tayyorlash uchun ishlatiladigan sabzavotlar, qovun, tarvuz, uzum mahsulotlari hamda ichimlik suvi sifatida ishlatilgan buloq suvidan laboratoriya tahlili uchun namunalar olingan.

Shifokorlar va DSENM xodimlari tomonidan “G‘ova” MFY hududida aholi o‘rtasida yuqumli va yuqumsiz kasalliklarning kelib chiqishi va tarqalishining oldini olish yuzasidan patronaj xizmatini kuchaytirgan holda targ‘ibot ishlari olib borilmoqda.