Davlat xavfsizlik xizmati Navoiy viloyati boshqarmasi xodimlari tomonidan o‘tkazilgan tezkor tadbir davomida Qozog‘iston Respublikasidan O‘zbekistonga katta miqdordagi psixotrop tabletkalari va “Gerbalayf” savdo belgisi ostida ishlab chiqarilgan, oziq-ovqat uchun mo‘ljallangan biologik faol qo‘shimchalarni noqonuniy olib kirgan shaxslar ushlandi. Bu haqda O‘zA xabar berdi.
Aniqlanishicha, 1977-yilda tug‘ilgan Jangildi Mapitov, 1982-yilda tug‘ilgan Seytjan Sabirbayev, 1985-yilda tug‘ilgan Umidjon Muhammedov va 1981-yilda tug‘ilgan Ziyovuddin Razzoqov Qozog‘istonda yashovchi “Sakon” ismli shaxs bilan o‘zaro kelishib, kontrabanda bilan shug‘ullangan.
Tezkor tadbir davomida qonunbuzarlardan jami 961 million so‘mlik 2000 dona “Sonnat” psixotrop tabletkasi va 25 turdagi “Gerbalayf” biologik faol qo‘shimchalari ashyoviy dalil sifatida olindi.
Shuningdek, ushbu shaxslar onkologik kasalliklarni davolash uchun mo‘ljallangan, lekin iste’molga yaroqsiz bo‘lgan ko‘p miqdordagi dori vositalarini ham olib kirgan.
Ular ushbu mahsulotlarni Toshkentda sotishni rejalashtirgan.
Hozirda mazkur holat yuzasidan DXX Navoiy viloyati boshqarmasi tomonidan Jinoyat Kodeksining 246-moddasiga (“Kontrabanda”) muvofiq jinoyat ishi qo‘zg‘atilib, tergov harakatlari olib borilmoqda.
Izoh (0)