Давлат хавфсизлик хизмати Навоий вилояти бошқармаси ходимлари томонидан ўтказилган тезкор тадбир давомида Қозоғистон Республикасидан Ўзбекистонга катта миқдордаги психотроп таблеткалари ва «Гербалайф» савдо белгиси остида ишлаб чиқарилган, озиқ-овқат учун мўлжалланган биологик фаол қўшимчаларни ноқонуний олиб кирган шахслар ушланди. Бу ҳақда ЎзА хабар берди.
Аниқланишича, 1977 йилда туғилган Жангилди Мапитов, 1982 йилда туғилган Сейтжан Сабирбаев, 1985 йилда туғилган Умиджон Муҳаммедов ва 1981 йилда туғилган Зиёвуддин Раззоқов Қозоғистонда яшовчи «Сакон» исмли шахс билан ўзаро келишиб, контрабанда билан шуғулланган.
Тезкор тадбир давомида қонунбузарлардан жами 961 миллион сўмлик 2000 дона «Соннат» психотроп таблеткаси ва 25 турдаги «Гербалайф» биологик фаол қўшимчалари ашёвий далил сифатида олинди.
Шунингдек, ушбу шахслар онкологик касалликларни даволаш учун мўлжалланган, лекин истеъмолга яроқсиз бўлган кўп миқдордаги дори воситаларини ҳам олиб кирган.
Улар ушбу маҳсулотларни Тошкентда сотишни режалаштирган.
Ҳозирда мазкур ҳолат юзасидан ДХХ Навоий вилояти бошқармаси томонидан Жиноят Кодексининг 246-моддасига («Контрабанда») мувофиқ жиноят иши қўзғатилиб, тергов ҳаракатлари олиб борилмоқда.
Изоҳ (0)