G‘uzor tumanidagi 33-sonli umumiy o‘rta ta’lim maktabi yaqinda ta’mirdan chiqdi. Qariyb 2 milliard so‘m mablag‘ evaziga mukammal ta’mirlanishi belgilangan maktabda qurilish-ta’mirlash ishlari chala tashlab ketilgan. Ularni yakuniga yetkazish uchun tumandagi katta zavodning 30 nafar ishchi-xodimi ham qurilish ishlariga jalb qilingan. Shunday bo‘lsa-da, maktabning bu boradagi muammolari arimayapti.
Maktabda bo‘lib, holatdan xabar topgan “Daryo” muxbirining yozishicha, ta’lim maskani “Vostok Magnat” MChJ quruvchilari tomonidan 1 milliard 989 million 180 ming so‘m mablag‘ evaziga 6 oy muddat davomida mukammal ta’mirlanishi lozim bo‘lgan.
— Yangi o‘quv yili boshlangan bo‘lishiga qaramasdan haligacha sinfxonalarimiz va yo‘laklardagi elektr simlari ochiq va o‘quvchilar hayoti uchun xavfli holatda turibdi, — deydi maktab direktori Zebo G‘aniyeva. — Qurilish tashkiloti rahbariga buni tushuntirishdan charchadik.
Aniqlanishicha, maktab ta’miri investitsiya dasturiga kiritilgan bo‘lib, buyurtmachi viloyat hokimligi “Yagona buyurtmachi xizmati” injiniring kompaniyasi bo‘lsa, pudratchi yuqorida tilga olganimiz “Vostok Magnat” MChJ bo‘lgan.
Jurnalistik kuzatuvlarimizga ko‘ra, 624 o‘ringa mo‘ljallangan maktabning kapital ta’miri chala tashlab ketilishi barobarida, sifatsiz qurilish materiallaridan ham foydalanilgan. Tashqi fasad uchun qo‘llanilgan bo‘yoqlar ham hali hech qancha vaqt o‘tmasdan ko‘chib tushmoqda.
Maktabning isitish tizimini yangilash uchun boshlangan xayrli ish faqat quvurlarni o‘rnatish bilan yakunlangan. Sinfxonalarda hatto isitish batareyalari ham yo‘q.
— Yangi o‘quv yili boshlanganiga 20 kundan ortiq vaqt o‘tgan bo‘lsa-da, sport zal ta’miri chalajon holatda tashlab ketilgan, — deydi ta’lim maskani rahbari Zebo G‘aniyeva. — Maktab o‘quvchilari uchun yangi hojatxona qurilib, allaqachon ishga tushishi kerak edi. Bizda esa hali devori ham bitmagan. Bu haqda nafaqat tuman rahbarlariga, hatto respublikaga ham murojaat qildim. Ammo natija chiqmayapti.
“Balki qurilish ishlari hali yakunlanmagandir, davom ettirishar”, deya bergan savolimizga maktab direktori Zebo G‘aniyeva qurilish mart—aprel oylarida boshlanganligi, avgust oyida yakuniga yetishi lozimligi, biroq 5-sentabrdan buyon qurilish tashkiloti ishchilaridan darak bo‘lmayotganini ma’lum qildi.
Direktorning aytishicha, tuman xalq ta’limi bo‘limi mudiri ham kuni kecha bo‘lib o‘tgan yig‘ilishda kapital ta’mirlangan maktablar uchun tuzilgan dalolatnomalarga imzo qo‘yganini bildirgan.
“Vostok Magnat” MChJning ayni kundagi rahbari Ulug‘bek Choriyevning “Daryo” muxbiriga ma’lum qilishicha, qurilish ishlari hali yakuniga yetmagan, davom etmoqda. Qurilish-ta’mirlash ishlari o‘z vaqtida yakuniga yetmay qolishi esa qurilish tashkiloti rahbariyatining o‘zgarishi bilan bog‘liq.
Ulug‘bek Choriyevning ma’lumot berishicha, “Vostok Magnat” MChJning 33-maktab ta’mirini qabul qilib olgan paytdagi rahbari Rustam Sa’dullayev bo‘lgan. Korxona Ulug‘bek Choriyev ixtiyoriga 2019-yil iyun oyida o‘tgan bo‘lib, o‘sha paytda maktab ta’mirining 10 foizigina bajarilgan. Ammo asosiy mablag‘ sarflab bo‘lingan.
— Nopok quruvchiga duch kelib qoldik, — deydi “Yagona buyurtmachi injiniring” kompaniyasi direktori Abdusamad Normo‘minov. – Berilgan mablag‘larni sarflab yuborib, qurilish ishlarini bajarmagan. Rustam Sa’dullayev ismli rahbarni izlab ham topolmaymiz. Hozirda Ulug‘bek Choriyev bilan birgalikda imkoniyatdan foydalanib, ishlarni bajaryapmiz.
Abdusamad Normo‘minovning iqror bo‘lishicha, mazkur maktab ta’miri “Vostok Magnat” MChJga G‘uzor tumani hokimining aralashuvi hamda tavsiyasi bilan hech qanday tendersiz topshirilgan.
Abdusamad Normo‘minov “Daryo” muxbirining “Vostok Magnat” ilgari viloyatdagi biror-bir ijtimoiy soha obyektini qurgan yoki mukammal ta’mirdan chiqarganmi, nima uchun qurilish obyekti hech qanday tendersiz qurilish tashkilotiga berib yuborilgan?”, deya bergan savoliga “Tender ham bo‘ladi”, deb javob berdi.
Surishtiruvlarimiz davomida qo‘limizga tushgan yana bir xatdan ma’lum bo‘lishicha, “Yagona buyurtmachi injiniring” kompaniyasi direktori A.Normo‘minov viloyat hokimi o‘rinbosari Sirojiddin Azizovni aldagan.
Viloyatdagi qurilishlarning asosiy buyurtmachisi bo‘lgan kompaniya direktori A.Normo‘minovning 2019-yil 6-sentabr kuni viloyat hokimi o‘rinbosari Sirojiddin Azizovga yo‘llagan javob xatidan anglashilishicha, maktab yangi o‘quv yiliga tayyor. Maktab hududidagi tashqi hojatxonaning so‘nggi pardozlash va qisman obodonlashtirish ishlari qolgan.
Viloyatdagi ijtimoiy soha obyektlarining qurilishiga mas’ul rahbar viloyat hokimi o‘rinbosarini shunday aldab turgach, uning maktab direktoriga rost gapirishini umid qilmasa ham bo‘ladi, nazarimizda.
Ma’lum qilinishicha, “Vostok Magnat” MChJga maktab hojatxonasini qurish uchun berilishi lozim bo‘lgan 278 million so‘m hali to‘lab berilmagan.
— Bu pulni bersak, buniyam yeb qo‘yishidan qo‘rqamiz, — deydi Abdusamad Normo‘minov. – Shuning uchun pulni ushlab turibmiz. Avval hojatxonani bitkazsin, keyin pulni to‘lab beramiz.
Aniqlanishicha, maktab direktori qurilish ishlari sifatsiz hamda belgilangan muddatdan kech qolayotgani bois dastlab tuman xalq ta’limi bo‘limi mudiriga, so‘ngra hokimiga murojaat qilgan.
Murojaati o‘rganilmagach, direktor Bosh prokuratura “eshigini qoqadi”. Bosh prokuraturadan 2019-yil 30-avgust kuni viloyat prokurori Botir Yusupovga yo‘llangan xatda murojaatda ko‘rsatilgan barcha vajlar soha mutaxassislari jalb qilingan holda viloyat prokuraturasi kuchi bilan to‘liq va sifatli o‘rganilishi lozimligi belgilanadi. Ayni kundagi voqealardan xulosa qilish mumkinki, Bosh prokuratura tomonidan viloyat prokuroriga berilgan topshiriq qog‘ozda qolib ketadi.
Maktab direktorining “Daryo” muxbiriga oshkor qilishicha, direktorning yangi o‘quv yili oldidan qurilish ishlari tugamay qolayotgani xususidagi shikoyatiga javoban rahbariyat hatto tumandagi katta zavodlardan birining 30 nafar ishchisini majburiy tartibda qurilish ishlariga jalb qilgan. Majburiy mehnatga jalb qilingan zavod ishchilari esa belgilangan ishni bajarishdan bosh tortib, maktab direktoriga e’tiroz bildirgan. Hatto uni haqoratlagan.
Zavod ishchilarining maktabdagi ta’mirlash ishlariga jalb qilinganini qurilish tashkiloti tomonidan mavsumiy ishchilar sifatida yollangan Abdulla G‘oyipov, Ma’ruf Suyarov hamda Hamidjon Normurodov ham tasdiqladi.
Maktab rahbariyatining “Daryo” muxbiriga qo‘shimcha qilishicha, maktab oshxonasining qurilishi ham o‘lda-jo‘lda qoldirilgan. Yangi o‘quv yili allaqachon boshlangan bo‘lsa-da, oshxona qurilish materiallari va anjomlarini saqlashga yarayapti, xolos.
— Mukammal ta’mirdan chiqayotgan maktab oshxonasi uchun eski eshik romlari o‘rnatildi, eshik romlari yangi qo‘yilishi kerakligini aytgandik, bizga achchiq qilib hatto boshqa romlarni ham o‘rnatishmay tashlab ketishdi, — deydi Zebo G‘aniyeva. – Maktabimiz uchun budjetdan qariyb 2 milliard so‘m mablag‘ berilgan. Shuncha pul qayerga ketyapti?
Ma’lum bo‘lishicha, loyihada maktab sport zali qoshida o‘quvchilar uchun yuvinish xonalari qurilishi ham ko‘zda tutilgan bo‘lsa-da, qurilish ishlari chuqur kavlash bilan to‘xtab qolgan.
Muammoni o‘rganish chog‘ida qurilish tashkiloti tomonidan yollanma ishchilar sifatida jalb qilingan Abdulla G‘oyipov, Ma’ruf Suyarov hamda Hamidjon Normurodov “Vostok Magnat” MChJ rahbariyati ularni ishchi sifatida jalb qilgani va bajarilgan ish uchun xizmat haqini to‘liq bermayotganidan shikoyat qildi.
— Qurilish tashkiloti mas’ullari 19 million so‘m pulimizni “ana beraman, mana beraman” deb 20 kundan beri aldab yuribdi, — deydi Abdulla G‘oyipov. — Va’da qilingan ish bajarildi, ammo va’da qilingan pul berilmayapti.
Maktab rahbariyati va qurilish tashkilotiga yollanma ishchi bo‘lib ishlagan ishchilarning taxminicha, qurilish tashkiloti katta qarzga botgan.
— Shu boisdan ham har safar pulimizni so‘rasak, “undan qarz olib kelyapman, bundan qarz olib kelyapman” deya nolishadi, — deydi Abdulla G‘oyipov. — Qurilish uchun berilgan pullar qani desak, “soliqdan qarzdorlikka ushlab qolishgan”, deyishadi.
Direktor Zebo G‘aniyevaning aytishicha, qurilish tashkiloti katta qarzga botgani uchun ham kapital ta’mir uchun ajratilgan mablag‘ yo‘qqa chiqyapti. Shu bois ham eng arzon va sifatsiz qurilish materiallari ishlatilgan.
— Hali qurilishimiz bitganiga hech qancha vaqt bo‘lgani yo‘q, ammo tashqi fasad qismidagi bo‘yoqlar ko‘chib tushyapti, — deydi maktab direktori. — Demak, sifatsiz bo‘yoq ishlatilgan.
G‘uzordagi muammoni o‘rganish chog‘i ko‘rgan va eshitganlarimizning aksariyati qurilishga mas’ul tashkilotning qurilishga uquvsizligini namoyon qilmoqda.
Xo‘sh, bunday mas’uliyatli vazifani mas’uliyatsiz quruvchiga ishongan rahbarlar qayerga qaramoqda? Maktab direktori ayol boshi bilan bolalar taqdiri uchun yelib-yuguryapti. Qolgan mutasaddilar-chi? Nega tomoshabin bo‘lib turishdan nariga o‘tmayapti? “Ushbu quruvchi tashkilotga biz ishonamiz” deya qurilish-ta’mirlash ishlari hatto tendersiz berib yuborilishiga sababchi bo‘lgan tuman hokimi nega mum tishlagan?
Savollar ko‘p, javoblarni esa mas’ullardan kutamiz.
Izoh (0)