“Milliy elektr tarmoqlari” korxonasi Afg‘onistonning Da Afghanistan Breshna Sherkat kompaniyasi bilan 10 yillik muddatga mo‘ljallangan “Ol va to‘la” sharti asosidagi kontraktni imzoladi. Bu haqda “Gazeta.uz” xabar bermoqda.
O‘zbekiston 2002-yildan beri Afg‘onistonga muntazam ravishda elektr energiyasi yetkazib keladi. O‘tgan vaqt mobaynida eksport qilinayotgan elektr energiyasining yillik hajmi 62 million kilovatt-soatdan joriy yil yakuni bilan kutilayotgan salkam 2,6 milliardgacha ko‘paydi. Biroq shu paytgacha yetkazib berish shartnomalari faqat yillik tuzib kelingan.
“Shartnoma 10 yilga mo‘ljallangan. Mavsumiy emas, yil mobaynida elektr energiyasi yetkazib berilishi hisobga olingan. Dastlabki bosqichda yetkazib berish hajmi 4,2 milliard kilovatt-soatni tashkil etadi, keyinchalik bu ko‘rsatkich 6 milliard kilovatt-soatga yetishi mumkin”, — dedi O‘zbekiston energetika vaziri o‘rinbosari Sherzod Xo‘jayev.
Vazir o‘rinbosarining qayd etishicha, kontrakt formulirovkasi qat’iyligiga qaramay, Afg‘onistondagi murakkab vaziyatni inobatga olib va jarimalar to‘lanishiga yo‘l qo‘ymaslik maqsadida shartlar birmuna yengillashtirilgan.
Izoh (0)