20-sentabr, juma kuni Toshkentda Markaziy Osiyo mintaqaviy iqtisodiy hamkorlik tashkilotiga a’zo davlatlarning energetika vazirlari tomonidan ularning mamlakatlariga “MOMIH—2030” uchun umumiy energetika strategiyasini ishlab chiqish va amalga oshirish majburiyatini yuklaydigan qo‘shma deklaratsiyani imzoladi. Bu haqda “Daryo” muxbiri Sevara Nishonova xabar berdi.
Hujjatni imzolash Markaziy Osiyo mintaqaviy iqtisodiy hamkorlik tashkiloti (MOMIH) ishtirokchi davlatlari energetika vazirlarining birinchi muloqoti doirasida amalga oshirildi.
Deklaratsiya o‘n banddan iborat bo‘lib, unda mamlakatlarning 2030-yilgacha umumiy energetika strategiyasini ishlab chiqish va Birlashgan Millatlar Tashkilotining barqaror rivojlanish sohasida “toza energiyadan foydalanishga erishish” haqida gapirilgan yettinchi maqsadiga erishish borasida hamkorlik qilish majburiyatlari aks etgan.
Deklaratsiya joriy yilning 24—25-sentabr kunlari BMTning barqaror rivojlanish sohasidagi sammiti arafasida imzolandi.
Yangi Energetika strategiyasi “MOMIH—2030” Osiyo taraqqiyot banki bilan hamkorlikda ishlab chiqilmoqda.
Strategiyaning maqsadi 2030-yilgacha BMTning barqaror rivojlanish kun tartibiga muvofiq mintaqada ishonchli, barqaror, isloh qilingan energiya bozorlarini yaratish hisoblanadi.
“Bugungi kunda Markaziy Osiyo mamlakatlari hukumatlari o‘z oldiga katta maqsadlarni qo‘ymoqda. O‘zbekiston moliyaviy va ekologik jihatdan barqaror energiya sanoatini rivojlantirish tarafdoridir. Biz o‘z maqsadimizga erishish uchun MOMIH mintaqasining boshqa davlatlari va xalqaro moliya manbalari bilan ishlashdan umidvormiz”, — dedi O‘zbekiston Energetika vaziri Alisher Sultonov.
Deklaratsiyani imzolagan mamlakatlar, shuningdek, quyidagi majburiyatlarni oldi:- 2023-yilgacha shamol va quyosh energiyasidan elektr energiyasi ishlab chiqarishni ikki barobarga ko‘paytirish;
- xususiy sektorga investitsiyalar kiritilishini ko‘paytirishni rag‘batlantirish uchun investorlarga ma’qul me’yoriy-huquqiy bazani yaratish bo‘yicha islohotlarni amalga oshirish;
- MOMIH doirasida moliyalashning mintaqaviy mexanizmlarini yaratish;
- MOMIH mintaqasida energetika sohasida kam sonli bo‘lgan ayollarning huquq va imkoniyatlarini kengaytirish.
Ma’lumot uchun, Markaziy Osiyo mintaqaviy iqtisodiy hamkorlik tashkiloti (MOMIH) mamlakatlari energetika vazirlarining birinchi muloqoti O‘zbekiston hukumati va Osiyo taraqqiyot banki tomonidan tashkil etildi.
Izoh (0)