“Daryo” nashrida “Qashqadaryoda yana ‘snos’ muammosi: Uyi va dorixonasi buzib tashlangan tadbirkor 4 yildan beri haqini ololmay sarson bo‘lmoqda” sarlavhali maqola chop etilgandi. Ushbu maqolaga Qarshi shahar hokimligi munosabat bildirdi.
Qarshi shahar hokimligi axborot xizmatining ma’lum qilishicha, maqolada ko‘tarilgan masala hokimlik tomonidan o‘rganib chiqilgan va tadbirkorning dorixonasi uchun berilgan yerto‘laga kirib-chiqish eshigi o‘rnatilgan.
“Haqiqatan ham 2015-yilda fuqaro Nurillayev G‘anisherga tegishli bo‘lgan, Qarshi shahri I.Karimov ko‘chasidagi 13-uy 6-xona ‘Hamrayev Erkin ta’mir binokor servis’ xususiy korxonasi tomonidan buzib olingan. Bu ish birinchi prezidentning 2013-yil 25-iyuldagi qarori bilan tasdiqlangan dastur asosida amalga oshirilgan, — deyiladi hokimlik axborot xizmatining munosabatida. — Mulkni buzib olish va yetkazilgan zararni qoplash masalasi 2015-yil 13-avgustdagi 15-sonli shartnoma bilan mustahkamlangan. Mazkur hujjatda qayd etilishicha, taraflar buzilishga tushgan turar joy evaziga shu yerning o‘rnida quriladigan yangi ko‘p qavatli uyning 1-qavatidan umumiy maydoni 50 kvadrat metr bo‘lgan noturar joy yerto‘lasi (maydoni 50 kvadrat metr) bilan xususiy mulk qilib berilishiga kelishishgan. Buning uchun qo‘shimcha to‘lov nazarda tutilmagan. Tadbirkorlik subyekti bu haqda fuqaroga kafolat xati ham taqdim etgan. 2016-yilning to‘rtinchi choragi obyektni Davlat komissiyasiga to‘liq topshirishning oxirgi muddati etib belgilangan”.
Qarshi shahar hokimligi tadbirkor uchun berilayotgan noturar joy hali-beri tadbirkor nomiga o‘tkazilmasligini yozmoqda. Ularning aytishicha, quruvchi kredit olish uchun mazkur ko‘p qavatli uyni garovga qo‘ygan.
“Hamrayev Erkin ta’mir binokor servis” xususiy korxonasi rahbariyati taqdim etgan ma’lumotga ko‘ra, “Mustaqillik” mahallasi I.Karimov ko‘chasidagi buzilgan uylar o‘rnida tushgan yangi qo‘p qavatli uy qurilishi tijorat banki krediti hisobiga moliyalashtirilgan. Mavjud tartibga ko‘ra, qurilish tashkiloti bank oldidagi qarzni to‘liq qoplamaguncha bank mulkni garovda ushlab turishi, uni fuqarolarga rasmiylashtirib bo‘lmasligi bildirilgan.
Demak, uyi va dorixonasi buzilgan tadbirkor yangi bino qurilishini 4 yil kutgani yetmaganidek, endi “quruvchi kreditini qachon yopadiyu, qachon hujjatlarni rasmiylashtiraman” deb ham yana bir necha yil kutadimi? Tadbirkorning manfaati eng oxirgi o‘rindami?
Ma’lum qilishlaricha, Qarshi shahar hokimligi tadbirkorga berilishi ko‘zda tutilgan noturar joyni ham borib ko‘rgan.
“Qo‘p qavatli uyning birinchi qavatidan ajratilgan xona aslida 53 kvadrat metr, yerto‘lasi esa 100 kvadrat metr ekani tegishli kadastr hujjati va o‘tkazilgan o‘lchov ishlari chog‘ida o‘z tasdig‘ini topdi, — deyiladi hokimlik munosabatida. — Ya’nikim, qurilish tashkiloti shartnomada belgilanganidan ko‘ra ortiqchasi bilan noturar joy taklif etgan. Ishchi guruhi o‘rganishi davomida qurilish tashkiloti va fuqaro o‘rtasidagi asosiy tushunmovchilik yerto‘laga qo‘shimcha kirib-chiqish imkonini beruvchi yo‘lak bilan bog‘liq ekani oydinlashdi. Fuqaro yo‘lak ochib berishni talab qilgan joy bugungi kunda boshqa bir tadbirkorga tegishli. Albatta, quruvchi ushbu qo‘p qavatli uyni tijorat maqsadini ko‘zlab, sotib daromad olish uchun bunyod etgan. Bu borada uni ayblash noo‘rin. Qonunga zid xatti-harakat, fuqaro G‘.Nurillayev huquqini buzuvchi holat qayd etilmadi”.
Hokimlikning “Albatta, quruvchi ushbu qo‘p qavatli uyni tijorat maqsadini ko‘zlab, sotib daromad olish uchun bunyod etgan”, degan gapiga tamoman qo‘shilgan holda, hokimlikka bir savol bilan yuzlanamiz. Quruvchi tadbirkor yo‘lak deya atayotgan xonani avvaldan boshqa tadbirkorga sotishni maqsad qilgan bo‘lsa, unda nega tadbirkorga mo‘ljallangan xonadan o‘sha yo‘lakka chiquvchi eshik o‘rnatadi? Qani bu yerda mantiq?
Hokimlik axborot xizmatidan ma’lum qilishlaricha, tadbirkorning yerto‘lasiga ko‘p qavatli uyning orqa tomonidan kirish eshigi ochib berilgan. Tadbirkor G‘.Nurillayev esa boshqa e’tirozi yo‘qligini ma’lum qilgan.
Hokimlik tadbirkorning boshqa e’tirozi yo‘q deyaptiyu, buni asoslovchi biror bir hujjat ko‘rsatmayapti. Shu boisdan ham tadbirkor G‘anisher Nurillayev bilan bog‘landik.
— Dorixonam yerto‘lasiga kirib-chiqish uchun alohida yo‘lak ochib beramiz deyishgandi, — deydi G‘anisher Nurillayev. — “Mulkka egalik huquqini tasdiqlovchi hujjatlarini ham taqdim etamiz” deyishgandi, ammo haligacha jimlik. Shunchaki eshik ochib qo‘yish bilan ish bitmaydi.
Tadbirkorning aytishicha, muammoga yetarli darajada e’tibor qaratilmayotganligi bois, u mas’ullar bilan uchrashish niyatida Toshkentga ketgan.
Qarshi shahar hokimligi axborot xizmati muammoga yechim topilganligini yozish barobarida, tahririyat jurnalistini masalaga noxolis yondashuvda ayblaydi.
Unda shunday deyiladi: “Avvalo maqola sarlavhasida bo‘rttirish borligini qayd etmay ilojimiz yo‘q. Shu yo‘sinda mavzuni kuchaytirishga, vahima uyg‘otishga urinilgani ko‘rinib turibdi. Sarlavhada urg‘u berilgani kabi aslida masala ‘snos’ga taalluqli emas. Negaki gap uy-joyni buzib olish haqida ketmayapti. Avval boshdan bu borada muammo bo‘lmagan, aks holda quruvchi va fuqaro zararni qoplash haqida o‘zaro shartnoma imzolamagan, kelishuvga bormagan bo‘lardi. Hammasi ana shu shartnoma shartlarining qay darajada bajarilganiga taqalgan. Birgina yo‘lak ochilishi bilan muammo barham topgani ham fikrimizni isbotlaydi”.
Qiziq, hokimlik axborot xizmati munosabati avvalida tadbirkorning uyi hamda dorixonasi 2015-yil qurilish tashkiloti tomonidan buzib tashlanganligini yozyapti. Keyin esa gapidan qaytib, “Negaki gap uy-joyni buzib olish haqida ketmayapti” deyapti. Axborot xizmati o‘zi yozgan munosabatni o‘zi o‘qidimikan?
Hokimlik axborot xizmati jurnalistni ayblashda davom etadi va “Tadbirkor 4 yildan beri haqini ololmayapti, deyilmoqda. Bu ham jurnalistning vaziyatni xolis turib o‘rganmagani, sababi bilan qiziqmagani, obyektiv omillarni e’tiborga olmagani bilan bog‘liq”, deydi.
Oddiy arifmetika: Uy va dorixona 2015-yil buzilgan. Hozir 2019-yilda yashayapmiz. Shu paytga qadar tadbirkorga noturar joy berilmagan. Demak, oradan to‘rt yil o‘tgan bo‘ladimi?
— Maqolada yana bir jihat e’tibordan chetdan qoldirilgan, — deyiladi hokimlik axborot xizmatining munosabatida. — Quruvchi buzilgan uy-joy evaziga fuqaro G‘.Nurillayevga shartnomada ko‘rsatilganidan ortiqchasi bilan joy taklif qilgan. Birinchi qavatda joylashgan noturar joyning maydoni 53 kvadrat metrni, yerto‘laning maydoni esa 100 kvadrat metrni tashkil etadi. Vaholanki, o‘zaro kelishuvga ko‘ra, bu raqam mos ravishda 50 kvadrat metrdan kam bo‘lmasligi kerakligi aytib o‘tilgan.
Hokimlik axborot xizmati mas’ullari og‘iz ko‘pirtirib, “tadbirkorga 53 kv/metr noturar joy va 100 kv/metr yerto‘la berildi”, deyapti. Lekin buni asoslovchi biror bir hujjat ko‘rsatishga ojiz. Demak, tadbirkorning chirqirashida jon bor.
Hokimlik axborot xizmati muxbirning maqolada shahar hokimini tilga olishini “jurnalistning aybdorlarni ko‘paytirishga urinishi”, deya baholaydi.
“... maqolada muallif aybdorlarni ko‘paytirishga, tekshirib ko‘rmagani holda mutasaddilarni asossiz ravishda yomonotliq qilishga uringani seziladi. Muammo faqat ikki kishi o‘rtasida, rozi-rizolik bilan hal qilinishi kerak bo‘lsa-da, maqolada Qarshi shahar hokimligi ham tilga olinadi”.
Qarshi shahar hokimligi axborot xizmati mas’ullari “snos” masalasi hokim aralashuvisiz bitmasligini yaxshi bilashadi, albatta. Shunday bo‘lsa-da, maqolada hokim tilga olinganini “xato” deya baholashmoqda. Bundan xulosa qilish mumkinki, tadbirkor hokim qabuliga borganda “bu masalaga hokim aralashmaydi”, deb murojaatchini iziga qaytarishgan ko‘rinadi. Yo‘qsa, tadbirkor OAV ga murojaat qilib, adolat izlamasdi.
Hokimlik maqolada tilga olingan boshqa masala haqida hech qanday ma’lumot bermagan. Aholi xonadonlaridagi isitish masalasiga e’tibor qaratmagan. Demak, bu masala bilan umuman qiziqmagan ko‘rinadi. Aholining “Daryo” muxbiriga takroriy murojaat qilishicha, quruvchi “otopleniye”ni bir haftada o‘rnatib berishni va’da qilgan bo‘lsa-da, va’dasida turmagan. Aholi muammosi haligacha yechilmagan.
Izoh (0)