Rossiya parlamenti quyi palatasi raisi Vyacheslav Volodin O‘zbekistonga keldi

Oliy Majlis Qonunchilik palatasi spikeri Nurdinjon Ismoilov 16-sentabr kuni O‘zbekistonga tashrif bilan kelgan Rossiya parlamenti — Federal majlisning quyi palatasi — Davlat Dumasi raisi Vyacheslav Volodin boshchiligidagi delegatsiyani qabul qildi.

Qonunchilik palatasi matbuot xizmatining xabar berishicha, uchrashuvda O‘zbekiston—Rossiya parlamentlararo munosabatlari kun tartibidagi qator masalalar muhokama qilingan. Muloqotda Rossiya Davlat Dumasi bilan hamkorlik Oliy Majlis Qonunchilik palatasi faoliyatining strategik yo‘nalishlaridan biri ekani ta’kidlangan.

“O‘zbekistonda Rossiya yaqin qo‘shni, do‘st va ishonchli hamkor sifatida ko‘riladi. O‘zbekiston bilan Rossiya o‘rtasidagi munosabatlar vaqt sinovidan o‘tgan mustahkam do‘stlik asosida rivojlanmoqda”, — deyiladi O‘zbekiston parlamenti quyi palatasi matbuot xizmati tarqatgan axborotda.

Vyacheslav Volodin qabul va suhbat uchun minnatdorlik bildirib, muloqotning kelgusida ham davom ettirilishida o‘zaro manfaatlilik, ikki tomonlama munosabatlarni rivojlanishida parlamentlararo aloqalarni yanada kengaytirish muhim ekanini ta’kidlagan.

“Munosabatlarimizda tanaffus bo‘lgan davr yakuniga yetdi. Ushbu munosabatlar faqat o‘sish yo‘nalishida rivojlanib boradi, deb umid qilamiz”, — deya Volodinning uchrashuvdagi so‘zlaridan iqtibos keltirmoqda “RIA Novosti”. Uning qayd etishicha, Rossiya Davlat Dumasi spikeri O‘zbekistonga so‘nggi bor 2006 yili rasmiy tashrif bilan kelgan, uning o‘zbekistonlik hamkasblari esa Rossiya 1990-yillardan beri bo‘lmagan.

Muzokaralar yakunida Qonunchilik palatasi va Davlat Dumasi o‘rtasida parlamentlararo hamkorlik haqidagi kelishuvni imzolash marosimi bo‘lib o‘tgan. O‘z navbatida, rossiyalik deputatlarga O‘zbekistonda navbatdagi parlament saylovlarini kuzatuvchi sifatida ishtirok etish bo‘yicha taklifnomalar taqdim qilingan.

“RIA Novosti” agentligi xabariga ko‘ra, Vyacheslav Volodin O‘zbekistonga safari davomida Senat raisi Tanzila Norboyeva bilan ham uchrashadi. Shuningdek, u O‘zbekiston Prezidenti Shavkat Mirziyoyevning qabulida ham bo‘lishi kutilmoqda.