Andijon viloyati Majburiy ijro byurosi tomonidan yil davomida suv ta’minoti va oqova suv tarmoqlariga ulanish, ichimlik suvini talon-toroj qilinishi, iste’moli bilan bog‘liq 13 ta noqonuniy holat aniqlanib, 13, 285, 6 million so‘mlik dalolatnoma tuzilgan. Bu haqda Andijon viloyati MIB matbuot xizmati “Daryo”ga ma’lumot berdi.
Xususan, “Suvoqova” davlat unitar korxonasi Xo‘jaobod tumani filialida mas’ul lavozimida ishlab kelgan Q.Dadajonov, fuqarolardan suv iste’moli uchun yig‘ilgan 40 million 780 ming so‘m mablag‘ni o‘z manfaati yo‘lida ishlatib yuborgani aniqlangan.
Ma’lum qilinishicha, MIBning Xo‘jaobod tuman bo‘limi tomonidan unga nisbatan O‘zbekiston Respublikasi Jinoyat kodeksining 167-moddasi 2-qismi “g” bandi (Mansab mavqeyini suiiste’mol qilib, o‘zlashtirish yoki rastrata yo‘li bilan talon-toroj qilish) asosida jinoyat ishi qo‘zg‘atilgan.
Jinoyat ishlari bo‘yicha Buloqboshi tuman sudi hukmiga muvofiq Q.Dadajonovga tegishli jazo qo‘llanilgan.
Ma’lumot uchun, Andijon viloyati MIB tomonidan o‘tgan davrda 35 milliard so‘mdan ortiq mablag‘ undirilgan.
Avvalroq MIBning Toshkentda banklar foydasiga jami 1,5 milliard so‘m undirib bergani haqida xabar bergandik.
Izoh (0)