Олий Мажлис Қонунчилик палатаси спикери Нурдинжон Исмоилов 16 сентябрь куни Ўзбекистонга ташриф билан келган Россия парламенти — Федерал мажлиснинг қуйи палатаси — Давлат Думаси раиси Вячеслав Володин бошчилигидаги делегацияни қабул қилди.
Қонунчилик палатаси матбуот хизматининг хабар беришича, учрашувда Ўзбекистон—Россия парламентлараро муносабатлари кун тартибидаги қатор масалалар муҳокама қилинган. Мулоқотда Россия Давлат Думаси билан ҳамкорлик Олий Мажлис Қонунчилик палатаси фаолиятининг стратегик йўналишларидан бири экани таъкидланган.
«Ўзбекистонда Россия яқин қўшни, дўст ва ишончли ҳамкор сифатида кўрилади. Ўзбекистон билан Россия ўртасидаги муносабатлар вақт синовидан ўтган мустаҳкам дўстлик асосида ривожланмоқда», — дейилади Ўзбекистон парламенти қуйи палатаси матбуот хизмати тарқатган ахборотда.
Вячеслав Володин қабул ва суҳбат учун миннатдорлик билдириб, мулоқотнинг келгусида ҳам давом эттирилишида ўзаро манфаатлилик, икки томонлама муносабатларни ривожланишида парламентлараро алоқаларни янада кенгайтириш муҳим эканини таъкидлаган.
«Муносабатларимизда танаффус бўлган давр якунига етди. Ушбу муносабатлар фақат ўсиш йўналишида ривожланиб боради, деб умид қиламиз», — дея Володиннинг учрашувдаги сўзларидан иқтибос келтирмоқда «РИА Новости». Унинг қайд этишича, Россия Давлат Думаси спикери Ўзбекистонга сўнгги бор 2006 йили расмий ташриф билан келган, унинг ўзбекистонлик ҳамкасблари эса Россия 1990 йиллардан бери бўлмаган.
Музокаралар якунида Қонунчилик палатаси ва Давлат Думаси ўртасида парламентлараро ҳамкорлик ҳақидаги келишувни имзолаш маросими бўлиб ўтган. Ўз навбатида, россиялик депутатларга Ўзбекистонда навбатдаги парламент сайловларини кузатувчи сифатида иштирок этиш бўйича таклифномалар тақдим қилинган.
«РИА Новости» агентлиги хабарига кўра, Вячеслав Володин Ўзбекистонга сафари давомида Сенат раиси Танзила Норбоева билан ҳам учрашади. Шунингдек, у Ўзбекистон Президенти Шавкат Мирзиёевнинг қабулида ҳам бўлиши кутилмоқда.
Изоҳ (0)