Vazirlar Mahkamasi qarori bilan Rossiyaning “Moskva energetika instituti (MEI)” milliy tadqiqot universiteti Toshkent filialiga rahbar tayinlandi, deya xabar bermoqda Adliya vazirligining Telegram’dagi “Huquqiy axborot” kanali.
Hukumatning 15-sentabrdagi qarori bilan Hojiakbar Daliyev Rossiya universiteti filialining ijrochi direktori lavozimini egallagan. Xabar berishlaricha, Daliyev mazkur tayinlovga qadar O‘zbekiston Milliy universiteti Fizika fakulteti dekani edi.
“MEI” milliy tadqiqot universitetining Toshkent filiali O‘zbekiston Prezidentining 2019-yil iyun oyidagi qaroriga asosan tashkil etilgan (filialni ochish bo‘yicha kelishuv 2018-yil oktabrida imzolangan edi).
Filialning asosiy vazifalari etib quyidagilar belgilangan:
- O‘zbekiston energetika tarmog‘i uchun malakali muhandis-texnik kadrlar tayyorlash;
- zamonaviy ta’lim dasturlari va o‘qitish shakllarini ishlab chiqish;
- sohaga oid ilmiy va innovatsion tadqiqotlar olib borish;
- ta’lim va ilmiy-texnik sohada yetakchi xorijiy ta’lim muassasalari bilan munosabatlarni rivojlantirish;
- ehtiyojga ko‘ra mazkur soha mutaxassislarining malakasini oshirish.
Izoh (0)