Vazirlar Mahkamasining 15-sentabrdagi qarori bilan Mendeleyev nomidagi Rossiya kimyo-texnologiya universitetining Toshkentdagi filiali ijrochi direktori tayinlandi, deya xabar bermoqda “Huquqiy axborot” kanali.
“Buyuk kelajak” ekspert kengashi a’zosi, materialshunoslik va innovatsiyalarni boshqarish sohasida mutaxassis, shu vaqtgacha O‘zbekiston innovatsion rivojlanish vaziri o‘rinbosari sifatida ishlab kelgan Yo‘lbarsxon Mansurov endi Rossiya universitetining Toshkentdagi filialiga rahbarlik qiladi.
Ma’lumot uchun, Rossiya kimyo-texnologiya universitetining Toshkentdagi filiali faoliyatining asosiy yo‘nalishlari etib quyidagilar belgilangan:
- O‘zbekistonning sanoat tarmoqlaridagi muhim ilmiy-texnologik vazifalarni hal etishga qodir bo‘lgan yuqori malakali muhandis-texnik kadrlarni xalqaro ta’lim standartlariga muvofiq tayyorlash;
- nanomateriallar kimyoviy texnologiyasi, materialshunoslik va materiallarni korroziyadan saqlash, materiallarga badiiy ishlov berish texnologiyasi va sanoat ishlab chiqarishining boshqa sohalarida fundamental va amaliy ilmiy tadqiqotlar olib borish;
- ta’lim hamda ilm-fanning uzluksizligi va izchilligi, shuningdek, ularni jahon ta’limi va ilm-fani hamjamiyatiga integratsiya qilish hisobiga mutaxassislar va ilmiy-pedagogik kadrlarni tayyorlash, qayta tayyorlash va malakasini oshirish;
- muhandis-texnik va ilmiy kadrlar tayyorlash tizimini takomillashtirish va modernizatsiya qilishga yo‘naltirilgan yangi ta’lim dasturlari hamda o‘qitish shakllarini ishlab chiqish va tatbiq etish;
- ta’lim, ilm-fan va ishlab chiqarishning yaqin integratsiyalashuvi uchun shart-sharoitlar yaratish;
- ilmiy-pedagogik salohiyatning rivojlanishini qo‘llab-quvvatlash, pedagogik texnologiyalar va o‘qitish usullarini faol takomillashtirish;
- ta’lim hamda ilmiy-texnikaviy sohalarda xorijiy mamlakatlarning yetakchi ta’lim muassasalari, ilmiy-tadqiqot markazlari va biznes hamjamiyati bilan uzoq muddatli munosabatlarni rivojlantirish va mustahkamlash.
Izoh (0)